AmbonVibes.com — Wali Kota Ambon Bodewin Wattimena biking inga, katartiban deng kaamanan par maso har raya Kajadiang deng Tambaru, akang paleng panting. Dia minta samua warga jaga dong pung lingkungan masing-masing, juga jaga ana-ana.
“Jaga katanangan lingkungan, awasi anana jang biking tindakan seng bae, jang sampe dong mabo-mabo ato balap liar,” ujar Bodewin waktu buka Safari Natal Kecamatan Baguala di Gedung SMTPI Sektor Bethel, Jemaat Halong Anugerah, Kamis (4/12/2025).
Menurut Bodewin, Ambon yang aman deng dame, itu su jadi kabutuhan samua pihak.
“Bukang cuma pemerentah. Mari katong jaga lingkungan par maso Kajadiang deng Tambaru deng tanang,” ujarnya.
Bodewin jelaskan, kagiatan safari pas hari raya kaagamaan macang Kajadiang deng Idul Fitri, itu su biasa Pemkot Ambon biking. Samua itu par lebe deka antara pemerentah deng rakyat, skaligus pemerentah unju kalesang par masyarakat.
Wali kota tambahkan, satiap safari salalu pake acara bage-bage bantuan sabage bentuk kapadulian pemerentah par warga yang parlu. Safari Natal kali ini, Pemkot kase 100 paket sembako par masyarakat.
“Katong harap kagiatan macang ini bisa bangong rasa kabarsamaan antara pemerentah deng masyarakat. Pemerentah tarus bakarja par masyarakat, deng masyarakat tau ada pemerentah yang parhatikan dong pung kabutuhan,” terang Bodewin.
Bodewin juga minta dukungan masyarakat par biking majo Kota Ambon. Dia sebut, taong 2025, Pemkot fokus par biking bae infrastruktur dasar, macang jalan, aer barsih, lampu jalang, deng tata pasar.
“Katong pastikan Ambon jadi kota yang barsih deng parbaikan pangalolaan sampah, tarmaso ganti bak sampah beton jadi wastebin. Mar akang pung sukses tagantong masyarakat mo buang sampah di akang tampa deng tapat waktu,” jelasnya.
Wali Kota Bodewin himbau masyarakat rayakan Kajadiang deng Tambaru pake cara-cara sederhana deng bangong sikap padulu par sasama. (New)
