AmbonVibes.com – DPRD Provinsi Maluku nanti mo bentuk Tim Pangawasan Khusus par jaga kepeng Rp1,5 triliun, hasil bapinjam di PT Sarana Multi Infrastruktur (SMI). Informasi ini datang dari Anggota Dewan Ary Sahertian kepada wartawan di Ambon, Kamis (4/12/2025).
Menurut Ary, tim pengawasan khusus nanti pantau samua proses, mulai dar panyaluran sampe implementasi program di lapangan. Samua ini par cegah, jang sampe kepeng bocor.
Dia bilang, banyak orang hati susah deng kepeng basar Rp1,5 triliun. Jangan-jangan
kepeng bocor. Menurut Ary, pengalaman kamareng-kamareng soal kepeng basar ini biking publik jua hawatir jang sampe bagemana-bagemana.
“Katong seng mau ulang kasalahan masa lalu. DPRD mo bentuk tim pengawasan khusus yang nanti pantau samua tahap penyaluran dan implementasi program,” tegasnya.
Maski pinjaman itu su iko proses evaluasi keuangan dan akang layak, Ary tegaskan parsetujuan itu bukang akhir dar tanggung jawab DPRD, malaengkan awal pangawasan panjang.
“Parsatujuan cuma awal. Lebe panting itu bagemana kepeng ini pake deng bae, sondor bocor, dan banar-banar sampe ke masyarakat yang butuh,” kata Ary. `
Ary juga soroti tantangan basar par Maluku sabage provinsi kapulauan. Menurut dia, biaya operasional deng transportasi antarpulau bisa-bisa sedot kepeng kalo seng kelola deng bahemat-hemat.
“Maluku pung ribu pulau. Salurkan program seng rupa daratang. Katong musti susun strategi yang efisien agar kepeng seng tabuang di biaya administratif atau transportasi yang lebe-lebe,” jelasnya.
Salaeng jamin pamakean kepeng yang transparan, Ary bilang banya tokoh masyarakat dan organisasi sipil su sampekan song pung aspirasi. Salah satunya, agar sabageang dana bage akang par program pemberdayaan nelayan dan petani. Dua sektor ini yang jadi penopang ekonomi masyarakat Maluku.
“Katong musti dengar suara masyarakat. Banya yang inging kepeng ini pake par kas nae kesejahteraan sektor primer yang langsung sonto rakyat,” tambahnya.
Ary biking inga, pamarataan musti jadi prinsip utama dalang pemakean kepeng pinjaman ini.
“Seng boleh ada daerah yang katinggalan. Baik itu Buru, Tual, Seram, maupun Ambon, semua harus dapa manfaat yang adil. Ini janji katong par saluruh rakyat Maluku,” tutupnya. (Leo)
