AmbonVibes.com — Kakarasang par parampuang deng anana di Maluku lebe hari lebe banya. Data polisi deng LSM sama-sama bilang bagitu.
Pemkot Ambon bagara capat. Wali Kota Ambon Bodewin Wattimena kastau, Pemkot mo sadia rumah aman sementara atau rumah singgah par korban kakarasang.
“Maski deng kepeng kurang-kurang, taong muka katong mo sewa satu rumah, paleng kurang, bisa pake par rumah aman samantara ato rumah singgah par korban kakarasang, juga korban sosial yang laeng,” ungkap Wali Kota Bodewin waktu bicara di kagiatang 16 Hari Kampanye Anti Kakarasang Par Parampuang di Taman Galala, Salasa (25/11/25).
Menurut Bodewin, rumah aman sementara ato rumah singgah yang dong su rencana biking, akang jadi pondasi awal par bisa sadia fasilitas perlindungan yang lebe layak.
“Mudah-mudahan akang bawa manfaat, dan itu bentuk komitmen katong sampe nanti kalo kepeng su cukup, katong kasbadiri rumah singgah yang lebe layak,” tandasnya.
Bodewin kase apresiasi par aktivis yang biking 16 hari kampanye anti kakarasang par parampuang. Kagiatan itu, kata Bodewin, bukang sekadar seremoni, mar wujud kehadiran pemerintah deng aktivis, juga lembaga yang bagara dalang isu kemanusiaan.
“Beta kira ini kagiatan yang tarus katong biking saban taong, tagal komitmen Pemerentah Kota par hadir deng para aktivis, Komnas HAM deng samua lembaga NGO yang paduli parampuang dan anana,” ujarnya.
Bodewin tegaskan, kampanye ini jadi momentum par biking inga samua orang par rasa penting tolak dan biking kurang kakarasang dalang bentuk apa pun.
“Katong harap, saban kali katong kampanye anti kakarasan par parampuang, akang biking inga katong par bisa tanggung jawab kas kurang, deng tolak tindakan kakarasan par parampuang,” jelasnya. (Piere)
