AmbonVibes.com – Warga Kota Ambon ada sio-sio ka Pemerintah Kota (Pemkot) par pasang tamba kamera CCTV di tampa-tampa rawan kriminalitas. Wali Kota Ambon Bodewin Wattimena langsung respon akang.
Warga pung parmintaan ini, akang muncul setelah kajadian-kajadiang kriminal balakangan jadi sorotan publik. Banya yang nilai, samua ini tagal pengawasan visual di lokasi strategis seng bajalang deng bae.
Wali Kota Bodewin tegaskan, Pemkot Ambon su pasang amper 50 unit CCTV yang tabage di ruas jalan utama deng ruang tabuka publik sebage bagian dari visi biking Ambon sebage kota cerdas yang aman dan nyaman.
“Katong tarus usaha kase rasa aman par masyarakat deng tambah CCTV di ruang publik. Ini katong pung komitmen, bukang sekadar cari pembanaran,” ujar Wali Kota, di Balai Rakyat, Karpan, Ambon, Jumat (21/11/2025).
Maski bagitu, ia mangaku kepeng seng banya. Kepeng jadi tantangan utama par biking luas jangkauan jaringan CCTV. Titik yang dong anggap rawan, seperti kawasan A.Y. Patty, PHB, dan wilayah militer, balong takover kamera pengawas.
“Khusus area militer, katong seng pung kewenangan pasang di situ,” jelasnya.
Wali Kota juga tekankan, keamanan kota bukang cuma tagantung teknologi semata. Peran aktif masyarakat, terutama orang tua, paleng panting par cegah anana bajalang malam sampe lat-lat.
“Kaamanan bukang hanya soal CCTV. Katong parlu orang tua kontrol agar anana seng bakaliaran sampe larut malam. Ini masalah orang pung kalakuang. Kalo samua ini musti pemerintah urus, kapan masyarakat bisa mandiri?” ujarnya.
Bodewin tambahkan, kriminalitas bisa jadi di mana saja, sondor lia ndang lokasi atau status wilayah. Tagal itu, seng batul juga kalo ada insiden langsung orang kas tasangko akang deng kinerja pemerentah daerah.
“Yang penting samua warga taat atorang hukum. Penegakan hukum adalah ranah kepolisian, dan beta parcaya Polri akan upaya maksimal tangkap para pelaku,” tegasnya.
Wali Kota ajak samua elemen masyarakat par ambe peran aktif dukung upaya penegakan hukum. Bodewin minta warga seng sambunyi palaku kejahatang dan kase informasi yang akurat par aparat.
“Terkadang katong cenderung sambunyi palaku. Kalo katong lebe tabuka deng kooperatif, masalah ini akang lebe gampang dapa hendel,” pungkasnya.
Wali Kota tekankan, biking bae kaamanan deng katertiban di Kota Ambon itu tanggung jawab sama-sama, yang parlu sinergi antara pemerintah, aparat penegak hukum, dan samua lapisan masyarakat. (Piere)
