AmbonVibes.com – Anggota Komisi III DPRD Maluku Rovik Afiffudin dorong pemerintah daerah par ator ulang kendaraan dinas yang pakai seng efektif. Rovik bilang bagitu pas abis rapat karja Komisi III bersama mitra, Selasa (18/11/2025).
Menurut Rovik, banya oto deng motor oras ini cuma tatumpuk deng su seng pakai, sampe jadi beban APBD.
“Kalo jual, bisa maso APBD. Akang pung nilai bisa dapa Rp4–5 miliar. Dana itu bisa pakai par bangong jalang atau program laeng yang lebe mendesak,” jelasnya.
Rovik tekankan, verifikasi par samua oto deng motor pung kondisi, parlu paskali, par putuskan jual atau mau tetap pakai. Dia kas contoh, kalo ada dinas yang mo tarek atau bali kendaraan, tinggal ator. Mar kalo seng parlu, lebe bae jual sa.
Mangapa sampe Rovik tamaso par oto deng motor dinas? Ini tagal oto deng motot pung biaya rawat cukup basar.
“Satu mobil bisa parlu Rp1–2 juta per taong. Kalo kali jumlah ratusan unit, total bisa Rp200–300 juta. Balong biaya bahan bakar,” kata Rovik.
Rovik bilang, kendaraan yang su lama ada di tangan pejabat, seng salalu harus dapa tarek karena bisa muncul kesan negatif.
“Ada yang su puluhan taong pegang oto. Jual sa par penghargaan. Mangapa musti tarek par bikin malu orang?” ujarnya.
Langkah penataan ini dia harap bisa biking ringan beban APBD sekaligus bikig optimal aset daerah, khususnya par dukung pembangunan prioritas di Maluku. (Keket)
