AmbonVibes.com – Su paleng lama paskali, orang Lease mimpi bisa badiri sandiri jadi daerah otonom, lapas dar Kabupaten Maluku Tengah. Kaliatang, mimpi itu su mo jadi nyata.
Komisi I DPRD Provinsi Maluku su kase dukungan fol-fol par dong bisa kas badiri Kota Kepulauan Lease, jari Daerah Otonomi Baru (DOB) di Maluku.
Dukungan Komisi I ini muncul dalang rapat dengar pendapat (RDP) deng Tim Pemekaran atau Konsorsium DOB Kabupaten/Kota se-Maluku, di ruang rapat Paripurna DPRD Maluku, Kamis (13/11/25)
Ketua Komisi I DPRD Maluku Solihin Wally, bilang, abis dengar paparan tim pemekaran, komisi lia, samua syarat administrasi pembentukan daerah baru su lengkap.
“Secara administrasi samua su lengkap. Katong Komisi I DPRD Maluku dukung penuh pembentukan Kota Lease,” tegas Wally.
Wally kase tau, komisi nanti mo baku ator deng Gubernur Maluku par susun rekomendasi dan surat keputusan bersama antara DPRD dan Pemerintah Provinsi.
Dokumen ini nanti jadi dasar pengusulan DOB Kota Lease — deng 14 daerah otonomi baru yang laeng — ka pemerintah pusat.
“Katong mo bicara deng Pak Gubernur par ada rekomendasi dan surat keputusan bersama, lalu usul ka Komisi I DPR RI,” ujarnya.
Selain dukungan administratif, Komisi I juga mo bahas soal kepeng par dukung proses pembentukan daerah baru ini.
Menurut Wally, Komisi mo pangge Sekda Provinsi Maluku par pastikan ada kepeng par persiapan. DOB.
Katua Konsorsium Pemekaran DOB Kota Kepulauan Lease Prof. M.J. Septeno, kas inga, perjuangan par kas badiri daerah otonomi baru di wilayah Pulau-Pulau Lease su bajalang amper dua pulu taong.
“Katong mo biking hidop kumbali samangat parjuangan ini. Samua elemen di daerah, bae provinsi bae kota, su katong kase bagara par kaputusan 15 taong kalamareng bisa jadi dasar kas tarus perjuangan,” ungkap Septeno.
Sapteno harap dukungan DPRD Maluku bisa jadi angin par orang Lease, lah dong pung mimpi bisa jadi nyata.
“Kalo Tete Manis pung mau deng moratorium buka, katong su siap. Semoga perjuangan ini bisa biking orang Lease jadi lebe bae eso-eso,” tutup Sapteno. (red)
