AmbonVibes – Polres Maluku Tenggara (Malra) resmi tetapkan dua perangkat Ohoi (desa) Watkidat, Kecamatan Kei Besar Selatan Barat, sebagai tersangka dugaan fikfok Anggaran Pendapatan dan Belanja Ohoi (APBO) tahun 2022 dan 2023.
Kapolres Malra AKBP Rian Suhendi, kase tau, penyidik su pariksa 63 orang saksi deng 1 ahli. Selain itu, dokumen dan surat terkait kepeng APBO Iko dapa sita par jadi barang bukti.
Hasil audit Inspektorat Malra dapa tau ada kerugian kepeng negara sebesar Rp633,37 juta, deng rincian Rp 385,69 juta par taong 2022 dan Rp 247,68 juta par taong 2023.
Dua tersangka, yaitu Kapala Ohoi (Kepo) Watkidat J.F deng Kaur Keuangan/Bendahara Ohoi Watkidat B.F. dapa tau urus kepeng APBO sondor ada perangkat ohoi yang laeng Iko urus. Dong dua biking balanja fikfok, Mark up, deng kurang balanja di berbagai nota deng kwitansi yang ada dalang Laporan Pertanggungjawaban (LPJ).
“Dari hasil penyidikan dan gelar perkara, tim su dapa lebe dar dua alat bukti sah par tetapkan dong dua jadi tersangka,” ujar AKBP Rian.
Kedua bos kampung ini dapa sangka langgar Pasal 2 ayat (1) jo. Pasal 18 UU Nomor 31 Tahun 1999 tentang Pemberantasan Tindak Pidana Korupsi, yang su ubah pake UU Nomor 20 Tahun 2001.
Ancaman hukuman par dong dua bisa bui saumor hidop, ato paleng kacil ampa taong deng denda peng kacil Rp200 juta.
Setelah berkas penyidikan su lengkap, pada 30 Oktober 2025, Polres Malra su antar dong dua ka Kejaksaan Negeri (Kejari) Malra par proses hukum lebe lanjut.
AKBP Rian tegaskan, penanganan kasus ini jadi bukti komitmen kepolisian par ambe tindakan par sapa yang pake salah kepeng ohoi yang biking rugi masyarakat.
“Katong akang tarus kawal akuntabilitas pengelolaan dana desa agar benar-benar pake par kepentingan ohoi ratut,” pungkasnya. (Vera)
