AmbonVibes.com – Nasib PPPK dan CPNS di lingkup Pemerintah Kota Ambon sempat tagantong. Dua bulang laste, gaji PPPK balong dapa, terus CPNS cuma sabulang, itu bulang Juni 2025. Kapala BPKAD Kota Ambon Jopie Silanno mangaku akang memang su bagitu.
“Memang banar, gaji PPPK par Oktober dan November balong dapa bayar. Lalu, CPNS pung Juni ada tatahang,” ujar Silanno waktu dapa tanya, di Balai Kota Ambon, Salasa (4/11/2025).
Silanno bilang, maski ada talat, Pemkot Ambon mo kas beres hak-hak PPPK dan CPNS pas November ini.
Akang pung proses, kata Silanno, memang parlu waktu. Untuk CPNS, dapa angka deng SK bulang Juni, lalu masing-masing pegawai lapor ka OPD. Trus, bendahara input data pegawai, tunjangan istri, tunjangan anak, sampe daftar gaji, sebelum kiring akang ka BPKAD deng Taspen. Bagitu juga PPPK yang dapa angka Oktober lalu, proses input gaji baru biking November.
“Katong ada proses bayar gaji bulang November. Abis itu baru katong lanjut proses gaji Oktober. Par November, paleng lat tanggal 5 sampe 10 su dapa bayar. Sadangkan par Oktober, proses dari tanggal 10 sampai 15. Jadi bulan ini, dua bulan gaji PPPK pasti lunas,” jelasnya.
Gaji CPNS yang balong dapa bayar juga ada proses. Silanno bilang, gaji bayar lat ini seng sangaja.
“Katong seng ada niat biking talat. Proses ini memang parlu waktu tagal susun daftar gaji iko SK di OPD masing-masing. Yang pasti, samua nanti selesai sebelum November laste,” tandasnya.
Silanno minta PPPK dan CPNS basabar sadiki, yang jalas Pemkot Ambon kase pasti dong pung hal nanti tarima fol-fol bulang November ini jua. (red/mcambon)
