AmbonVibes.com – Stella Marcelina Joice Kaya resmi bawa nama Kota Ambon ka tingkat nasional pas dapa tau lolos jadi finalis Bintang Radio Indonesia 2025. Stella nanti baku adu di Grand Final yang dong biking di Jakarta, November eso-eso.
Stella pung teknik manyanyi biking tiga juri Bintang Radio Indonesia 2025 Indra Aziz, Key B, dan Bemby Noor, seng ragu par kas lolos dia waktu pengumuman 10 finalis, Senin (28/10/2025) di Jakarta.
Juri Indra Azis bilang Stella mampu bawa lagu genre melo dengan artikulasi jelas dan dinamika paleng bagus.
“Biar ada sadiki kelemahan, Stella pung kelebihan teknik dibanding kontestan laeng. Artikulasinya jelas, dinamika paleng bagus,” puji Indra.
Juri Key B bilang, kesan atau impresi yang Stella kase par pendengar akang paleng bagus.
“Impression Stella paleng kuat dar muka sampe akhir lagu, mulus deng seng goyang,” ujar Key B.
Stella Kaya nanti manggurebe gelar juara deng sambilang finalis laeng. Dong sambilang itu Romie Janiero (Manokwari), Hifnie Zaidan Wafi (Gorontalo), Sutera Dipha (Bukit Tinggi), Gloretha Beathrice (Manado), Sabilla Shaitra (Bandung), Bayu Al Wagfa (Sumenep), Steven Axvellius Kwa (Jakarta), Anastasia Desti Putri (Semarang), deng Rahmat Bahari Harun (Makassar).
Deng darah Haria Leawaka Amapati yang su banya pung penyanyi top, banya orang parcaya Stella bisa biking prestasi bae par biking harum Ambon.
Stella maso final ini kabar bae, deng bukti Ambon City of Music, yang tarus kase talenta-talenta yang mampu bersaing di level nasional. (Keket)
