AmbonVibes.com — Pemerintah Kota (Pemkot) Ambon melalui Dinas Pekerjaan Umum dan Penataan Ruang (PUPR) su biking tampa bakas lahan pasar apung di Pante Mardika jadi tampa parkir par warga yang biking apa-apa di deka-deka situ.
Plt. Sekretaris Kota Ambon Robby Sapulette kastau akang dalang acara Wali Kota dan Wakil Wali Kota Jumpa Rakyat (WAJAR) ke-21, Jumat (24/10/2025) di Balai Kota.
“Dinas PU su biking tampa parkir, lalu sadiki lai Dinas Perhubungan mulai tes pake akang. Su ada jalang maso par pi tampa parkir,” ungkap Sapulette.
Menurut dia, PU bangong akang seng talalu lama tagal tampa itu kamuka su ada beton, tinggal pasang pambatas. Nanti, mo pasang kalo kepeng su ada taong muka.
Deng su sadia tampa parkir, Pemkot harap kendaraan seng parkir di badang jalang lai pas orang ada sibuk biking apa-apa di Pante Mardika.
“Sakarang katong su bikingi tampat parkir par kendaraan seng talamburang di jalang. Samua maso ka sini,” jelas Sapulette.
Sapulette bilang, pemerintah mo pasang rambu larangan parkir dan mo karja sama deng TNI/Polri par tegakkan atorang par warga yang langgar.
“Kalo su ada rambu dilarang parkir mar masih ianggar, katong mo baku ator deng polisi par ambe tindakan,” pungkasnya. (Leo)
