AmbonVibes.com — Pemerintah Kota Ambon tarus karja karas par jaga Labuang Ambon. Dong su kas turung ampa prau capat saban pagi par angka sampah yang anyo-anyo di aer masing.
Kapala Dinas Lingkungan Hidup dan Persampahan (LHP) Kota Ambon Apries Gasperzs bilang, prau capat akang oprasi saban hari jam 08.00 sampe 12.00 WIT.
“Ini su jadi katong program rutin. Sabang pagi prau capat turung kas barsih aer masing dalang labuang,” ujar Apries, Kamis (23/10/2025).
Apries bilang, metode ini akang masih konvensional dan balong maksimal. “Prau capat cuma bisa sampe di tampa rerbatas, apalai kalo sampah batambong. Tagal itu katong sadia kapal manyapu yang lebe bae,” jelasnya.
Kapal manyapu ini hasil karja sama Sea Cleaner, Dinas LH Provinsi Maluku, deng Dinas LHP Kota Ambon yang nanti mo datang November 2025, lalu akang bisa oprasi Februari 2026.
Pemkot Ambon pung rencana mo pasang jareng tadah kotorang di tiga titik sungai yang akang pung kaki aer di Labuang Ambon. Tiga sungai itu wairuhu di Galala, Sungai Waiheru, dan waitomu di Mardika, 27 Oktober 2025.
“Upaya ini bageang dar komitmen katong par jaga Labuang Ambon pung manis. Katong mau masyarakat deng wisatawan bisa rasa Aer Labuang yang barsih, sondor ada sampah plastik,” tambah Apries.
Apries bilang, warga Ambon pung rol paleng parlu. “Biar barapa banya alat yang katong sadia akang, mar kalo warga seng parnah sadar, parkara sampah nanti seng abis-abisi,” tegasnya.
Deng su ada kapal manyapu, juga teknologi yang pas, Apries harap sampah aer masing di Ambon bisa dapa urus deng lebe bae.
“Target katong, Teluk Ambon barsih kumbali macang dolo-dolo, jadi orang Ambon pung bangga,” pungkasnya. (Piere)
