AmbonVibes.com — Pemerintah Australia tambah serius bikin Maluku par jadi tamang bae di kawasan timur Indonesia. Duta Basar Australia par Indonesia Rod Brazier, bilang akang pas baku dapa Gubernur Maluku Hendrik Lewerissa, di ruang karja Gubernur, Senin (20/10/2025).
Dalam pertemuan yang bajalang paleng hangat deng akrab, bae dubes bae gubernur baku mangarti par biking luas karja sama dan investasi di macang-macang sektor penting, termasuk pendidikan, kesehatan, pertanian, perikanan, dan perdagangan internasional.
“Katong bilang danke banyak par gubernur yang su tarima katong deng paleng bae. Tadi katong bacarita banya par ambe langkah nyata biking kuat karja sama Maluku deng Australia termasuk dukungan pembangunan, biking bae kapasitas pendidikan, dan beasiswa par anana Maluku yang mo Pi balajar di Australia,” ujar Brazier.
Dubes Brazier bilang kedekatan geografis dan hubungan sejarah antara Maluku dan Australia akang jadi alasan kuat provinsi ini pung posisi pintu gerbang karja sama kawasan Pasifik Selatan.
Gubernur Hendrik Lewerissa jua antusias deng komitmen Dubes. Hendrik bilang, dia mau Maluku tabuka par investasi yang bisa kase manfaat langsung par masyarakat.
“Katong mau karja sama ini nyata dan bajalang sondor putus. Maluku pung potensi basar di sektor perikanan, pertanian, dan perdagangan. Katong siap buka ruang par investasi yang pung dampak positif par rakyat,” tegas Hendrik.
Pertemuan ini jadi langkah awal kemitraan ekonomi baru antara Maluku dan Australia, yang dong dua harap bukang cuma diplomasi seremonial, mar akang bisa bawa dampak nyata par biking bae hidop orang banya di Maluku. (Leo)
