“Musti pecat sondor hormat!” Teriak Uwa Ina dar dapor.
Uwa ada goreng ikang di kuali, mar mata ada di layar hape.
“Barani beta dapa akang oknum ini, beta ramas sampe dia pung gigi manyangkal tutang,” Uwa Ina pung suara pica par amper malang.
Tata Boni ada dudu minung kofi di foris. Paitua amper tatigo dengar Uwa Ina. Paitua badiri lalu bajalang ka dapor.
“Setuju, nyora e? Pecat saja! Tar war par biking Arab Saudi deng Irak!” Tata Boni langsung sumbur.
Uwa Ina nganga Tata Boni satu nafas.
“Maniso deng sorang pung bola tar entos-entos,” balas Uwa Ina.
“Lah su musti pecat, kio! Katong seng lolos piala dunya ni!” Tata Boni bale kumbali.
“Ini oknum. Bukang Patrick Kluivert, Tata e!” Kata Uwa Ina lalu bula-bale ikang goreng di kuali.
“Oknum? Oknum sapa lae, Ina?” Tanya Tata deng rasa penasaran.
“Makanya, baca! Baca, Tata!” Kata Uwa Ina lalu kase unju barita di layar hape.
Tata ambe hape lalu tikang mata di layar. Bagitu dapa judul, langsung baca deng suara karas.
“Polda Maluku karas par oknum brimob tagal maeng seks deng nona 16 taong! Bapa kamponang. Oknum e! Cari daong muda e!” Tata baca langsung komentar kaluar lae.
Tata pung jari geser-geser layar. Kage dapa barita satu lae, lalu baca karas-karas lae.
“Mama deng bini teror nona 16 taong, korban seks oknum brimob Maluku! Sio, oknum kumbali! Maitua deng Mama su iko campor lae?” Tata geleng-geleng kapala.
“Pecat ka seng?” Tanya Uwa Ina, pas kas mati kamfor.
“Musti pecat sondor hormat!” Jawab Tata Boni.
“Setuju, pecat! Biking malu sa! Pecat!” Memi pung suara biking kage Tata deng Uwa.
“Beta lae setuju pecat! Kas pulang dia ka Balanda!” Mima pung suara jua nae lae, lalu dong dua maso dar pintu dapor.
“Huiii, Memi Mima! Ini bukang sepakbola. Ini oknum yang pung oyot seng dengar-dengaran. Anana muda yo, malas baca. Baca banya par bisa tau banya,” kata Tata, lalu sorong layar hape ka muka Memi deng Mima.
Memi deng Mima manggurebe baca akang.
“Beta bale herang. Ada karja bae-bae, pi biking ancor hidop sandiri. Padahal jadi aparat itu seng gampang. Seng samua orang bisa maso. Ini su di dalang, ada seragam, capatu, pangkat, jabatan, gaji, samua itu bisa talapas!” Uwa Ina bale kasiang par akang oknum itu.
“Beta jua herang lae, Uwa! Oknum-oknum ini sondor jaga diri bae-bae. Talalu iko daging pung mau!” Bagitu komentar Mima.
“Oyot seng dengar-dengaran! Hura!” Ujar Tata.
“Haha hae! Huuu!” Dong ampa pica di dapor. (Manu Tura Meten)
