AmbonVibes.com — Suasana lantei 2 Kantor BPKAD Aru, Sabtu (4/10/2025), akang laeng dar laeng. Anana Marbali Ukulele Kids nae deng senyum lapas deng Paleng gerat bawa konser musik “Merajut Harmoni Tanpa Batas.”
Nada lombo-lombo dar ukulele baku maso deng suara polos mar tulus dar anana Jargaria — sederhana, mar biking bulu badang badiri.
Konser ini bukang cuma soal musik mar juga soal cinta budaya, kebersamaan, dan kebanggaan jadi anana Maluku.
Musik, Anana, deng Cinta Budaya
Pembina Marbali Ukulele Kids A.L.O. Tabela bilang konser ini dapa dukung dar Balai Pelestarian Kebudayaan Wilayah XX Maluku. Akang jadi cara par kas kuat orang par sadar mo lestarikan budaya.
“Musik ukulele, tarian, sampai lagu-lagu modern — samua dapa raci par anana bisa nae panggung, balajar parcaya diri, Deng bangga budaya Maluku,” kata Tabela.
Menurut dia, konser ini jua jadi wadah par anana Jargaria asah bakat deng barani bawa diri di muka orang banya.
“Deng dukungan orang tua, pelatih, dan pemerintah, katong mau anana bisa Lia musik tradisi itu akang bagus, bisa bawa ka mana-mana,” tambahnya.
Budaya Itu Adab, Adab Itu Identitas
Mewakili Kepala Balai Pelestarian Kebudayaan Wilayah XX Maluku Ian Talahatu juga sempat kase pasang.
“Kebudayaan itu sumber dari adab. Sondor adab, katong bisa ilang jalang. Jadi, jaga budaya berarti jaga jati diri,” tegasnya.
Ia bilang, Marbali Ukulele Kids ini bukti anak-anak Aru bisa jadi duta kacil budaya lewat musik.
“Beta harap, konser ini biking kebudayaan jadi literasi hidup par samua ana Dobo. Dari sini, identitas katong sebagai anak Aru Tamba lebe kuat,” ujarnya.
Pemerintah Juga Turung Tangang
Dukungan juga datang dar Kadis Pendidikan dan Kebudayaan Kepulauan Aru Adolof Pokar, yang buka konser malam itu.
“Pelestarian budaya bukang cuma urusan pemerintah, mar jadi tanggung jawab samua. Masyarakat jua pung peran basar jaga adat deng tradisi,” katanya.
Ia apresiasi kolaborasi antara Balai Pelestarian Kebudayaan XX Maluku, pemerintah daerah, dan komunitas seni di Aru.
“Beta sanang lia anak-anak tampil deng gerat. Eso-eso, konser bagini bagus kalo biking di tampa tabuka par lebe deka deng masyarakat,” usulnya.
Harmoni Sondor Batas
Sepanjang konser, Marbali Ukulele Kids maeng 11 lagu, campor antara lagu daerah deng modern. Mar bukang cuma suara yang bagus — yang paling dapa rasa itu energi kebersamaan di antara mereka.
Par anana Aru, malam itu bukang cuma nae panggung. Mar jadi bukti bahwa musik, cinta, dan budaya bisa biking satu dalang perbedaan. Harmoni sondor batas — pas akang pung tema konser — benar-benar dapa rasa. (Maichel)
