AmbonVibes.com – Maya Baby Lewerissa dan Lisa Wattimena sama-sama petik ukulele di atas Kapal Layar Yacht Akuur, amper malang tadi. Lagu-lagu Ambon mangalir sapanjang balayar hasa-hasa pante Teluk Ambon.
Balayar pi-bale Pante Wainitu-Tanjung Martafons, istri Gubernur Maluku Hendrik Lewerissa deng istri Wali Kota Ambon Bodewin Wattimena itu dapa lia paleng sanang. Apalai, dong balayar deng anana ukulele dar Amahusu deng Mardika.
Paleng rame di atas kapal layar jenis Yacht deng nahkoda Johny Dahoklory, amper malang tadi. Lebe dua jam hasa-hasa pante Teluk Ambon, nyanyian dan ukulele dapa dengar akang paleng sadap.
Waktu matahari su mo maso di balakang Tanjung Alang, Maya Deng Lisa Tamba spanen. Apalae ada sejumlah tokoh parampuang iko balayar sama-sama.
Waktu balayar di dalang Labuang, Maya deng Lisa sempat kase pasang-pasang edukasi par anana.
Lisa ajak anana ukulele par slalu jaga lingkungan, jang sampe buang sampah sabarang tampa. Apalae Labuang Ambon akang bagus dan cocok par wisata.
“Kalo dong lia orang basar buang sampah takaruang, nanti anana tagor saja e,” ajak Lisa.
Sadangkan Maya ajak anana ukulele tetap andalkan musik, balajar tarus, deng musti cita-cita tinggi.
Maya bilang, kalo anana serius, dong pung musik bisa antar dong kuliling dunia.
Pas turung dari kapal layar, Lisa bilang hati paleng sanang balayar deng anana untuk edukasi.
“Paleng sanang bisa deng anana ukulele'” kata Lisa.
Di atas Yacht, ada pula satu dua pengurus Ambon Sailing Community (ASC). Komodor ASC Nico Tulalessy bilang par AmbonVibes, ide balayar ini muncol dar Lisa Wattimena. Tujuang cuma par biking edukasi lingkungan par anana. Tagal itu ASC paleng sanang bisa kolaborasi. (Opa)
