AmbonVibes.com – Wali Kota Ambon Bodewin Wattimena kase tunju konsep penataan kawasan Pantai Mardika, pas abis pimpin Apel World Cleanup Day 2025 di Lapangan Merdeka, Jumat (26/9/2025).
Menurut Bodewin, penataan nanti mo pake tampa parkir sementara dan fokus di dua tiga titik strategis, salah satunya Papalele Square. Tampa ini jadi lokasi mama-mama kaeng kebaya yang kamuka dong bajual di pos kacil sasa.
“Ini juga par katong jaga nilai-nilai budaya. Bisa jadi tampa kunjungan wisata, mama-mama bajual deng pake kain kebaya,” ujar Wali Kota.
Dua Area Jadi Fokus: Pusat Kuliner & Ruang Tabuka
Bodewin kase tau, ada dua tampa yang mo dapa biking bagus:
- Pusat kuliner balakang Amplas – kamuka-kamuka dong pake badang jalang pas malam hari. Sakarang mo kase pinda ka tampa baru par lia akang lebe bae.
- Ruang tabuka publik – akang dapa rancang par tampa dudu-dudu dan santai sambil minong kofi malang-malang hari.
Paitua harap konsep ini bisa biking moi Pante Mardika deng biking pengunjung lebe nyaman.
Edukasi Lingkungan & Pengembangan Kota
Menurut Bodewin, penataan ini akang pung tujuan edukasi lai. Deng biking tampa-tampa itu jadi barsih, tantu orang-orang seng buang kotorang sabarang dapa.
“Mudah-mudahan kalo tampa ini su barsih, orang nanti rasa malu par buang kotoran di sini. Ini sekaligus par ajar masyarakat,” tegas Bodewin.
Selain itu, penataan Pante Mardika juga par:
- Mo kembangkan kota yang lebe tertata dan modern.
- Mo kase pasti akses kendaraan di sepanjang jalan Pante Mardika sampe Batu Merah akang bajalang lancar.
- Mo ajar masyarakat par jaga kebersihan dan seng buang kotoran sabarang dapa.
Deng langkah ini, Pantai Mardika diharapkan seng cuma par destinasi wisata menarik, mar juga simbol Kota Ambon yang barsih, tertata, dan budaya tetap dapa jaga. (Leo)
