AmbonVibes.com – Bank Indonesia (BI) Kantor Perwakilan Maluku deng Pangkalan TNI Angkatan Laut (Lantamal) IX Ambon ada biking Ekspedisi Rupiah Berdaulat 2025. Dong bawa kepeng karing Rp5 miliar par tau pasti, Rupiah yang taputar di wilayah terdepan, terluar, dan terpencil (3T) tetap pung kualitas.
Ekspedisi ini pake KRI Gulamah 869 dan akang bajalang tujuh hari, 24–30 September 2025, maso di lima daerah: Siwalalat & Kian Darat (Pulau Seram), Pulau Banda, Kepala Madang & Leksula (Pulau Buru).
Pastikan Rupiah Layak Taputar
Kepala Grup Pengelolaan Uang Rupiah BI Hari Widodo bilang, tujuan ekspedisi ini par tau pasti kepeng rupiah cukup dan layak di seluruh Indonesia, lebe khusus di tampa-tampa terpencil.
“UU Nomor 7 Tahun 2011 kase mandat BI par biking pasti uang layak edar, jumlah cukup, dan akang pung pecahan sesuai kaparluan masyarakat. Makanya katong sinergi deng TNI AL. TNI jaga kedaulatan wilayah, BI jaga kedaulatan rupiah di samua jiko NKRI,” jelas Hari Widodo saat lapas ekspedisi, Rabu (24/9).
Ia bicara tegas, Rupiah bukang cuma alat bayar, mar juga simbol kedaulatan negara.
Layanan Kesehatan Terapung
Komandan Kodal IX Laksamana Muda TNI Hanarko Djodi Pamungkas bilang selain ekspedisi uang, dong lai biking pelayanan kesehatan terapung mini gratis di wilayah 3T.
“Jadi masyarakat bisa cek kesehatan gratis sambil akses uang rupiah yang layak,” ujar Hanarko.
Dukungan Pemprov Maluku
Sekda Maluku Sadali Le kase apresiasi par inisiatif BI. Menurut Dia, kegiatan ini biking bagara roda ekonomi masyarakat sampe tingkat paleng bawah, dan sampe maso di tampa-tampa yang selama ini sulit par akses tagal kendala geografis.
“Maluku itu provinsi kepulauan, ribuan pulau tabage di tampa yang luas. Akang pung tantangan itu biking rata pelayanan publik, termasuk sadia uang rupiah layak taputar,” katanya.
Ekspedisi Rupiah Berdaulat ini jadi langkah nyata BI & TNI AL par jaga kedaulatan Rupiah dan kedaulatan wilayah sekaligus kase manfaat langsung par masyarakat 3T Maluku. (Leo)
