AmbonVibes.com – Kabar seng sadap datang dari Seram Bagian Timur (SBT). Belasan anggota Brimob dari Kompi 3 Batalyon B Pelopor Polda Maluku dapa tau maeng kroyok warga di Desa Bula, Kecamatan Bula, Senin (22/9/2025) kira-kira jam 11.46 WIT. Korban utama, Aji Rumaday, deng ampa warga laeng yang coba pele, juga iko dapa rofol.
Proses Penyelidikan
Kabid Humas Polda Maluku Kombes Rositah Umasugi bilang, Provos Brimob deng Propam Polda Maluku su langsung turung tangang usut akang kasus. Samua korban su lapor di Sentra Pelayanan Kepolisian Terpadu (SPKT) Polres SBT.
“Jumlah oknum Brimob yang terlibat balong pasti, bagitu lai akang pung kronologi dari awal. Tim Provos dan Propam sedang cari tau samua fakta,” jelas Rositah.
Kapolda Maluku Parentah Usut
Rositah bilang, Kapolda Maluku Irjen Pol. Prof. Dr. Dadang Hartanto SH, SIK, M.Si,su parentah Dansat Brimob, Kasi Provos, dan tim Paminal Bid Propam par urus kasus ini sampe beres..
Rositah kas unju rasa paleng manyasal par tindakan anggota Brimob yang su maeng kasar deng terhadap warga sipil.
Kasus ini jadi perhatian serius soal disiplin aparat dan bagemana tindakan anggota Brimob harus tetap sesuai hukum, bukan malah biking susah orang. (red)
