AmbonVibes.com – Ketua DPRD Maluku Benhur G. Watubun minta pemerintah karja batul-batul lalu capat evaluasi program Makanan Bergizi Gratis (MBG). Evaluasi su musti tagal dalang satu minggu saja, ada tiga kasus anana skola takana racong dar MBG di tiga tampa yang baku jauh.
Tiga Kasus Racong Skaligus
DAda tiga kasus MBG racong pada September 2025:
- 11 September: 30 siswa SMP Negeri Tepa, Maluku Barat Daya
- 18 September: 17 siswa SD Negeri 19 Kota Tual
- 19 September: 16 siswa SD Inpres Passo, Kota Ambon.
Kajadiang ini biking orang banya hati susah deng marah. DPRD nilai, samua ini bisa jadi tagal program MBG pung kontrol paleng loga-loga.
Usulan Anggaran Langsung ke Orang Tua
Benhur bilang, kontrol tim SPPG terbukti balong efektif, sampe kasus makanang gizi jadi racong bagini.
“Skema MBG musti evaluasi total. Beta usul anggaran langsung kase par orang tua, nanti dong bisa mamasa iko standar gizi dan aman dari risiko kana racong,” kata Benhur di Ambon, Senin (22/9/2025).
Politisi PDI Perjuangan ini jua minta Presiden Prabowo Subianto coba lia ulang bae-bae mekanisme MBG par lebe aman deng efektif.
Komisi IV Turung Lapangan
Sementara itu, Ketua Komisi IV DPRD Maluku Saoda Tethool bilang, komisi mo turung langsung ka lapangan par cek dapur-dapur yang sadia MBG.
“Katong mo lia langsung dapor-dapor yang sadia MBG, par kasus bagini seng jadi kumbali. Kontrol musti yang batul-batul ,” tegas Saoda.
Dia tambah lae, MBG musti tolong tamba gizi siswa, bukang biking masalah kesehatan.
“Mudah-mudahan capat dong biking bae, mulai dari bahan baku sampe cara olah. Evaluasi total sangat penting, karena kalo sampe ada korban jiwa, itu bisa lebe brat,” tutup Saoda. (Leo)
