AmbonVibes.com – Wakil Wali Kota Ambon Ely Toisutta angkat suara soal informasi pelecehan yang jadi di tampa karja, Satpol PP Kota Ambon. Kasus ini tabuka waktu parampuang anggota Satpol PP buka akang pas program Walikota Jumpa Rakyat (Wajar), minggu barbaru.
Wawali Ely bilang, kalo su jadi pegawai Pemkot Ambon, samua personel musti karja deng tanggung jawab basar dan biking tampa karja sehat deng aman. Terutama par Satpol PP laki-laki, dong musti jaga tamang parampuang par seng jadi hal-hal yang biking trauma.
“Beta tahu tugas Satpol PP seng gampang. Kas jalang Perda di kota ini akang seng gampang. Mar deng rasa tanggung jawab basar, beta harap bapa ibu karja deng tako par Tongala,” kata Ely saat pimpin apel pagi, Senin (22/9/2025).
Ely tekan, Satpol PP laki-laki musti jaga tamang parampuang macang jaga kehormatan diri sandiri. Ia biking inga lai, dirinya juga parampuang, jadi penting par anggota jaga sikap dan kalakuang yang bae.
“Bapa-bapa Satpol PP, ale dong pung ade parampuang, sudara parampuang. Tolong jaga dong, jaga macang ale dong jaga kehormatan sendiri. Ini bukang cuma yang dar luar Ambon, mar juga yang asli Ambon. Dong karja sama-sama, jadi jaga dong samua,” pesan Ely.
Wawali kas inga lae, samua anggota Satpol PP karja sama dan baku lia, deng bagitu tugas berat bisa lebe haringang.
Satpol PP parampuang juga dapa kas inga par jaga sikap deng kalakuang, sadangkan Satpol PP laki-laki musti hormat akang parampuang dong.
Ely harap seng ada lai laporan kajadian yang seng diinginkan, dan akan meminta Kasatpol PP bikin pembinaan langsung kepada anggota yang bagitu.
“Menyikapi masalah kamaring, itu sangat miris. Katong seng usah tahu sapa salah, urusan itu nanti BKD peariksa secara administrasi,” tutup Wawali. (Piere)
