AmbonVibes.com – Wali Kota Ambon Bodewin Wattimena kase warning karas par samua Aparatur Sipil Negara (ASN) di Pemkot Ambon.
Ontua larang karas samua ASN yang mo mabo-mabo deng maeng judi di kantor. Kalo sampe dapa tangka, basadia jua par dapa strap sondor ada kase hati.
Kantor Bukan Tampa Judi & Miras
Bodewin bilang, peringatan karas ini bukang baru partama kali. Su ulang-ulang dong dapa kas inga di banya kesempatan. Mar kalo masih ada yang nekad, maka tindakan karas pasti dong dapa.
“Kantor itu tampa layan orang, bukang tampa mabo atau judi. Kalo masih ada ASN yang biking bagitu, seng ada kompromi lai,” tegas Bodewin, Senin (22/9/2025) di Kantor Gubernur Maluku.
Menurut dia, ASN su musti jadi contoh bae par orang banya. Kalakuang seng bae justru biking orang ilang rasa parcaya par pemerintah.
Mo Biking Apel Khusus ASN
Bodewin bilang su kase inga samua kapala dinas deng ASN par jaga integritas dan jang biking malu Pemkot.
“Beta su kase tau, seng ada hati lombo par ASN yang pung kalakuang biking rusak citra pemerintah,” jelas Bodewin.
Par tindak lanjut akang, Wali Kota biking rencana mo kumpul samua ASN dalang satu apel khusus.
Agenda utama mo bahas sikap dan kalakuang yang musti jaga akang par masyarakat tatap parcaya.
“Nanti beta kumpul samua ASN. Katong bicara bae-bae soal sikap kerja, par kepercayaan masyarakat tetap ada,” pungkasnya. (Piere)
