AmbonVibes.com – Satu kasus heboh muncul di lingkup Pemkot Ambon. Laklaki oknum anggota Satpol PP, inisial NW, diduga biking pelecehan par CM (19), CPNS yang baru maso.
Kasus ini tabuka bukang dar laporan polisi mar justru pas ada acara Wali Kota Ambon Jumpa Rakyat (Wajar), bageang dari acara harjadi ke-450 Kota Ambon, Senin (8/9/2025).
Akang Pung Kronologi
Dari cerita korban, kajadiang itu pas di Kantor Satpol PP. Pelaku, yang waktu itu ada mabo, dia sandar-sandar badan ka korban sampe sempat tarek nona pung baju di tampa parkir.
Akang pung kamuka, CM diam-diam sa, tagal masih CPNS. Mar lama-lama dia seng tahang lai, akhirnya barani carita akang langsung di forum Wajar.
Pemkot Ambon Ambe Langkah
Pj. Sekkot Ambon Roberd Sapulette bilang pemerintah su langsung ambe langkah capat.
“Pertama, katong pangge pelaku, korban, dan orang tua, juga pihak Satpol PP sama BKPSDM,” jelas Sapulette waktu abis rapat paripurna DPRD, Jumat (19/9/2025).
Surat pemeriksaan juga su dapa tandatangan dari BKPSDM. Proses berita acara ada jalang. Sapulette bilang, par jaga psikologis korban, sementara CM ditarek dolo dar tugas di Satpol PP.
“Kalobhasil pemeriksaan nanti mengarah ke pemecatan, itu pasti akan katong tindaklanjut akang,” tambahnya tegas.
Seng Ada Ampun par Pelecehan
Pemkot Ambon pung sikap tegas. Seng kase ruang par tindakan yang biking rugi pegawai maupun masyarakat.
“Katong serius. Pemerintah seng akan kase hati par kasus macang bagini, apalai ini pelecehan,” pungkas Sapulette. (Leo)
