AmbonVibes.com – Anggota Komisi I DPRD Kota Ambon Zeth Pormes angka bicara soal kasus kakarasang, biking rusak deng babakar rumah di Hunuth Ambon, 19 Agustus 2025 tempo hari.
Pormes bilang akang pas abis rapat deng orang Hunuth, aparat keamanan, dan pemangku kepentingan lain di Ruang Rapat Paripurna DPRD Kota Ambon, Rabu (17/9/2025).
Kaco Ulang-Ulang
Menurut Pormes, kasus Hunuth bukang kajadiang baru. Kamuka lae parnah ada kaco macang bagitu kdi Air Basar (Arbes) dan muka Gareja Silo.
“Kalo orang yang biking kaco dapa kas biar sondor proses hukum, orang laeng bisa pikir bebas biking hal macang bagitu deng bawa-bawa rombongan massa. Itu bahaya paskali, tagal bisa biking kakarasang su jadi macang barang biasa,” tegasnya.
Ia bilang, aparat jang cuma fokus biking rasa aman sasadiki sa. Yang paleng penting itu kepastian hukum par dong pelaku.
Polisi Musti Kas Jadi Tersangka
Pormes dorong Polresta Ambon- Lease capat-capat kas jadi tersangka parkara di Hunuth.
Menurut dia, bukti awal itu video deng foto dar masyarakat su cukup jadi petunjuk penting.
“Sapa sa yang biking kakarasang musti proses hukum dong. Deng bagitu, ada efek jera, orang pikir panjang sebelum biking kaco,” ujarnya.
Ampa Rekomendasi DPRD
Dari rapat Komisi I DPRD, ada ampa poin rekomendasi:
- Samua pihak, termasuk aparat keamanan, musti jaga ketertiban deng kenyamanan kota, bukang cuma di Hunuth.
- Polresta diminta lebe gali bukti dan kemungkinan tersangka baru.
- Pemkot deng polisi kas badiri pos di titik rawan kayak perempatan Gereja Silo, pertigaan Arbes, dan Hunuth.
- Insan pers jua musti biking berita yang seng biking umpan par kaco baru kumbali.
Hukum Musti Badiri Lurus
Di akhir kase keterangan, Pormes bale kumbali tekan sikap tegas aparat itu akang paleng penting paskali.
“Jang sampe kakasang jadi barang biasa. Hukum yang badiri lurus itu kunci par orang rasa aman dan seng ulang-ulang kaco kumbali,” pungkas Pormes (Leo)
