AmbonVibes.com – Su amper satu bulan sejak kajadiang penyerangan dan bakar rumah di Desa Hunuth, Kecamatan Teluk Ambon. Luka trauma masih dapa rasa, rumah-rumah banya angos tabakar, dan sampe oras tadi, warga mangaku dong balong dapa rasa adil.
Orang Hunuth Datang ka DPRD
Senin (15/9/2025), warga Hunuth dipimpin Ketua RT 002/RW 002 Benhard Kappuw datang ka Kantor DPRD Kota Ambon. Ada pengurus DPD KNPI Maluku batamang dong.
Orang Hunuth bawa tiga tuntutan: usut kase abis parkara bakar rumah, bangong kumbali rumah yang rusak, deng kasih jaminan keamanan yang jalas par orang Hunuth.
“Katong datang bawa suara warga. Jang ada maeng-maeng lae. Warga parlu keadilan, parlu rumah badiri kembali, deng parlu rasa aman,” tegas Benhard.
KNPI Kase Warning Karas
Sekretaris DPD KNPI Maluku Almindes Falantino Syauta bilang, dong seng parna mo tinggal babadiang kalo kasus ini dapa gantong lama. Dia sindir aparat penegak hukum yang loga-loga.
“KNPI Maluku deng orang Hunuth tegaskan: aparat jang maeng-maeng! Kalo Polda Maluku seng segera kase abis kasus ini, katong siap turung langsung bahkan kase bagara pemuda Maluku par kawal sampe abis,” tegas Almindes.
Dia ada tambah lae, “Jang biking orang sangsara dua kali – rumah su ilang, jang sampe keadilan jua ilang lae.”
DPRD & Pemda Juga Dapa Tola Par Bagara
KNPI juga kase inga DPRD Kota Ambon jang cuma tarima aspirasi, mar musti tekan pemerintah dan aparat hukum par ambe langkah nyata.
“DPRD dipilih rakyat par bela rakyat, bukang jadi penonton. Kalo cuma badiang, sama saja tutup mata oar orang Hunuth pung sangsara,” ujar Syauta.
Selain tuntut proses hukum, warga dan KNPI juga desak pemerintah daerah segera biking bae kondisi di Hunuth. Jadi, parlu bangong rumah yang tabakar kumbali deng biking pos pengamanan permanen di Hunuth.
Par KNPI Maluku, kasus Hunuth ini jadi ujian serius par pemerintah dan aparat. dia kase ultimatum jalas: usut tuntas, tangkap pelaku, bangun rumah warga, dan kasih jaminan keamanan. Kalo seng, pemuda Maluku siap turung deng rakyat par pastikan keadilan banar-banar ada. (Leo)
