AmbonVibes.com – Pemerintah Kota (Pemkot) Ambon mulai tambah sarius urus masalah sampah plastik yang sabang hari biking kota ini kotor tar abis-abis. Salah satu langkah streng ialah swalayan sakarang wajib pake kantong ramah lingkungan, bukan palastik sakali pake macang tas baribot.
Penjabat Sekretaris Kota Ambon Robby Sapulette bilang, atorang ini lahir tagal masyarakat su paleng resah.
“Kalo cuma surat edaran sondor tindakan tegas, masalah ini akang ulang-ulang tarus. Katong su paleng lama kase toleransi,” tegas Robby di Ambon, Jumat (12/9/2025).
Sampah Palastik di Ambon Nae Tarus
Data paleng laste, tahun 2024 kalamareng, Ambon pung sampah saban hari 246 ton. Dari jumlah itu, 168 ton lebih adalah palastik – itu su hampir sepertiga sampah kota ini.
Sakarang, Pemkot su kele PT Million Limbah Ambon par olah sampah palastik. Tiap bulan, perusahaan ini bisa proses 100–150 ton plastik par seng tatambong di TPA.
Atorang Su Jelas
Pemkot kase inga, sejak 1 Juli 2024, palastik sakali pake di ritel modern su resmi dapa larang. Akang pung dasar ada di Perpres No. 97 Tahun 2017, lalu dapa kas kuat deng Perda Kota Ambon No. 45 Tahun 2018 dan Perwali No. 7 Tahun 2017.
Artinya, swalayan dan pusat belanja harus jadi contoh, bukan malah tetap kase kantong plastik gratis par orang balanja.
Haros Jadi Contoh
“Mulai sakarang, pedagang terutama swalayan haros jadi contoh. Pake kantong ramah lingkungan, bukang palastik lae,” pungkas Robby.
Deng atorang ketat ini, Pemkot harap pola konsumsi masyarakat pelan-pelan barobah, dan Ambon bisa tamba barsih dar sampah palastik. (Piere)
