AmbonVibes.com, Ambon – Pemerintah Kota Ambon tamba serius kas kurang plastik sakali pake. Samua orang di Kota Manise lebe bae pake palastik yang ramah lingkungan.
Penjabat Sekretaris Kota (Sekkot) Ambon Robby Sapulette bilang, swalayan deng pusat belanja musti jadi contoh deng pake kantong ramah lingkungan mulai dar sakarang.
“Kalo cuma bikin surat edaran sondor tindakan tegas, masalah ini seng parna abis. Su talalu lama katong kase toleransi,” ujar Robby, Jumat (12/9/2025).
Sampah Plastik Jadi Masalah Serius
Menurut dia, banyak warga yang hati susah tagal sampah plastik tamba banya macang gunong. Padahal, aturan larangan plastik sakali pakai di ritel modern su berlaku sejak 1 Juli 2024, sesuai Perpres No. 97/2017, Perda Kota Ambon No. 45/2018, dan Perwali No. 7/2017.
“Mulai sakarang, pedagang apalai swalayan harus pake kantong ramah lingkungan. Dorang ini harus jadi contoh,” tegas Robby.
Angkot Nakal Juga Kena Tegur
Selain urusan plastik, Robby juga singgung sopir angkot yang suka kas turung penumpang padahal balong sampe tampa tujuan resmi, khususnya rute Latuhalat, Laha, sampe Hative.
Ia minta Dinas Perhubungan biking peringatan karas.
“Kalo sopir seng iko rute, kasi inga satu kali, dua kali. Kalo masih bandel, dia pung mobil parkir di kandang satu bulan kas tinggal par ada efek jera,” tandas Robby.
Jaga Ambon Lebih Bersih dan Tertib
Robby harap aturan ini bisa biking pelayanan publik lebe bae dan sekaligus bikin Ambon tambah barsih dar sampah plastik. (Leo)
