AmbonVibes.com – Panitia Khusus (Pansus) DPRD Kota Ambon bikin rapat kerja deng lurah, raja, kepala desa sampe Asosiasi Depot Aer Minum Kota Ambon, Jumat (12/9/2025).
Topiknya? Banyak depot aer minong isi ulang di Ambon yang ternyata balong pung izin resmi dan balong parnah dapa uji kelayakan dar Dinas Kesehatan.
Data Beda-beda di Lapangan
Ketua Pansus Erol da Costa bilang, rapat ini penting paskali karena aer minong akang talingkar langsung deng kesehatan masyarakat.
“Katong pangge dong tagal depot ini yang paleng di muka jaga kualitas air. Jadi akang pung pengawasan musti jalas,” kata politisi PAN itu.
Mar pas rapat, malah muncul data yang baku laeng. Dari Dinas Kesehatan tercatat 402 depot, sedangkan Asosiasi klaim ada 503 depot.
“Jumlah ini balong fix, masih parlu data dar desa-desa par lebe pasti,” jelas Erol.
Banyak Belum Uji Lab
Masalah paleng basar itu, masih banya depot bajalan sonder pake izin resmi. Artinya, aer isi ulang yang dong jual akang, balom dapa uji di laboratorium Dinas Kesehatan.
“Katong hati susah tagal ini soal keselamatan warga. Aer harus betul-betul dapa tes, jang sampe ada manipulasi,” tegasnya.
Siap Dorong Ranperda
Erol juga kase pasti, hasil rapat tadi akang dong pakai par kas capat Ranperda Depot Aier Minong.
“Nanti Pansus deng bagian hukum biking hasil akhir Ranperda biar cepat jadi Perda. Bagitu par lebe gampang kontrol, bahkan sampel aer bisa dicek langsung di depot,” pungkas Erol. (Leo)
