AmbonVibes.com – Gerakan Mahasiswa Kristen Indonesia (GMKI) Cabang Ambon, Komisariat ISIP Universitas Pattimura biking diskusi publik di Aula FISIP Unpatti, Kamis (11/9/2025).
Tema yang dong angka: “Re-Thinking Democracy: Membongkar Akar Masalah Politik Indonesia”.
Acara ini kas datang akademisi sampe aktivis yang bongkar-bongkar soal kondisi demokrasi Indonesia yang orang banya bilang tamba jau dar akang pung nilai asli.
Demokrasi di Simpang Jalang
Dalam closing speech, Ketua Bidang Organisasi GMKI Cabang Ambon Renno Patty, S.I.Kom, tegas bilang GMKI seng bisa dudu babadiang.
“Sakarang demokrasi ada di simpang jalang. GMKI musti jadi kekuatan moral. Katong musti barani radikal, maksudnya bapikir sampe ke akar persoalan, gugat struktur yang biking rakyat sangsara, dan kase kepastian demokrasi ini bale kumbali par rakyat kacil, bukang par oligarki,” ujar Renno.
Harus Piara Perjuangan
Renno juga ingatkan, demokrasi itu seng datang bagitu-bagitu saja, mar lahir dar perjuangan panjang rakyat.
“Tagal itu, GMKI akan tatap ada di garis muka: Perjuangkan keadilan, bela yang lemah, dan salalu biking inga penguasa bahwa kedaulatan itu rakyat punya,” tambah Renno.
Mahasiswa & Rakyat Jang Kalah
Di akhir acara, GMKI Ambon ajak mahasiswa dan masyarakat jangan putus asa.
“Katong musti tarus berjuang perbarui demokrasi Indonesia, biar bisa jadi tatanan yang lebe adil dan bermartabat,” bagitu seruan GMKI menutup diskusi. (Piere)
