AmbonVibes.com – Balai Pemasyarakatan (Bapas) Kelas II Ambon biking terobosan seru par para Klien. Kamis (11/9/2025), Bapas karja sama deng Balai Pelatihan Vokasi dan Produktivitas (BPVP) Ambon, tambah Griya Abhipraya Bupolo. Dong ajar Klien cara biking kopi kekinian yang ada tren di kalangan anana muda.
Kepala Bapas Ambon Ellen M. Risakotta bilang, tujuan pelatihan ini par Klien bisa pung bakal nyata pas kalo su abis masa bimbingan. Klien ini orang-orang yang tasangko masalah hukum, lalu dong dapa maso bui. Pas dong su mo kaluar, biasa ada macang-macang bimbingan di Bapas. Biking kopi ini salah satu bakal.
“Sakarang usaha kopi kekinian pung peluang bagus paskali. Deng keterampilan ini, Klien bisa mandiri dan buka usaha sandiri kalo dong su bale ka dalang masyarakat,” jelas Ellen.
Belajar Cold Brew sampe Moka Pot
Instruktur dari BPVP Ambon Raymon ajar tiga teknik kopi paling hits: Cold Brew, French Press, dan Moka Pot.
- Cold Brew seduh deng air dinging 8–24 jam, rasa ringan deng randah asam.
- French Press pake rendaman air panas deng tekanan manual, akang pung hasil, kopi lebe kuat.
- Moka Pot pake uap panas, mirip kopi espresso.
Raymon bilang samua teknik ini gampang pake akang, cocok par modal usaha dar rumah saja.
“Cold Brew itu pas par ana muda pencinta kopi dinging, sadangkan French Press deng Moka Pot lebe pekat. Modal jua seng mahal, jadi gampang mulai usaha,” kata Raymon.
Tamba Parcaya Diri
Salah satu Klien, sebut saja U, langsung dapa rasa akang pug manfaat.
“Beta jadi lebe parcaya diri coba barang baru. Ilmu ini penting paskali par buka peluang usaha di dunya kopi,” ungkapnya.
Dengan kegiatan ini, Bapas Ambon bukang cuma jadi pendamping Klien, mar juga biking bakal par dong deng keterampilan yang ada paleng parlu di pasar karja. Bapas harap, pas bale ka masyarakat, Klien bisa mandiri, produktif, deng bisa pung jalang usaha sandiri. (Piere)
