AmbonVibes.com – Pemerintah Kota (Pemkot) Ambon biking langkah baru par dong pung warga tambah sehat deng nyaman. Sebanyak 779 sambungan air barsih baru su buka di satu dua tampa, rupa di Negeri Halong deng Passo.
Wali Kota Ambon Bodewin Wattimena kase tau kabar bae ini pas rapat paripurna istimewa harjadi ke-450 Kota Ambon.
“Air barsih ini fondasi utama par kesehatan masyarakat, deng bageang dari visi Ambon Manise: Inklusif, Toleran, Berkelanjutan,” kata Wali Kota.
Dapa Rehab Sampe 2.000 Meter
Selain sambungan baru, Pemkot juga ada karja rehabilitasi jaringan distribusi air. Akang pung panjang 2.000 meter. Dong su ser akang klar Agustus 2025, par kas maso air bisa stabil dan par jangka panjang, samua warga bisa rasa akang.
Capaian Positif, Mar Masih Ada PR
Bukang cuma soal air, Ambon juga catat capaian lain. IPM (Indeks Pembangunan Manusia) su tambus 83,37 (kategori tinggi), ekonomi 2024 tumbuh 5,96% – lebe tinggi dari rata-rata nasional.
Mar masih ada tantangan. Tingkat pengangguran terbuka, ini soal orang-orang yang tarada hambak 11,65%, masalah sampah balong beres batul, dan infrastruktur masih parlu dapa biking par tamba banya.
Par urus sampah, Pemkot su karja deng bank sampah – sampe oras tadi su bali 3 ton plastik darmasyarakat par mo daur ulang. Samua ini par jadi edukasi lae bagemana cara handel sampah deng cara yang lebe ramah lingkungan.
Inovasi dan Kreatif Musik
Pemkot juga dorong inovasi. Mall Pelayanan Publik ada sementara bangong, deng rencana buka awal 2026.
Di bidang ekonomi, ada bantuan modal usaha par 650 UMKM, 50 Koperasi Merah Putih su jadi, tamba Deng 6.583 izin usaha baru pake sistem OSS.
Ambon tambah harum nama di luar negeri tagal UNESCO kumbali mangaku Kota Kreatif Musik deng predikat Excellent. Capaian ini tantu bisa buka lebe banya tampa karja par anana muda kreatif di kota ini.
Bagara Sama-Sama Par Ambon Lebe Bae
Deng pake tema “Bagara Sama-Sama Par Ambon, Maluku, dan Indonesia Pung Bae”, Wali Kota ajak samua pihak – masyarakat, akademisi, sampai dunia usaha – par kolaborasi.
“Ambon yang lebe bae cuma bisa katong dapa akang kalo katong samua bagara sama-sama, baku tongka, deng karja masohi,” tegasnya.
Langkah buka sambungan air barsih ini jadi bukti nyata kalo Ambon serius menuju masa depan yang lebe sehat, bersih, dan berkelanjutan. (Leo)
