AmbonVibes.com – UKM Lembaga Dakwah Kampus (LDK) Al Ikwan Universitas Pattimura biking acara keren deng nama “Orientation Odyssey Pattimura’s” yang pake tema “The Great Awakening: Masa Transisi dari Remaja ke Dewasa, dari Siswa ke Mahasiswa“. Dong biking akan di Student Center FKIP Unpatti, Kamis (4/9).
Dari Siswa ke Mahasiswa
Acara ini memang khusus par mahasiswa baru. Deng bagitu, dong bisa siap tada masa transisi penting – dari ana nae-nae badan jadi lebe calakate, dari siswa jadi mahasiswa deng tanggung jawab akademik dan sosial yang lebe basar.
Wakil Rektor Bidang Akademik Prof. Dr. Dominggus Malle bilang, status mahasiswa itu bukang maeng-maeng.
“Di dunia literasi cuma ada dua status yang pake kata maha: mahasiswa dan mahaguru (profesor). Jadi mahasiswa musti sadar ada harapan basar di dong pung bahu,” jelas Prof. Malle.
Malle juga kase apresiasi par LDK Al Ikwan yang su kase ruang par mahasiswa baru balajar arti perubahan status itu.
“Unpatti tarima mahasiswa baru sebagai insan akademik yang pung integritas, pung daya saing, dan bisa kontribusi par universitas, masyarakat, sampe bangsa,” tambahnya.
Pesan Wali Kota Ambon
Wali Kota Ambon Bodewin Wattimena ada datang lae. Ontua titip pasang penting. Ontua bilang, masa transisi ini bukan cuma ganti status, mar perubahan basar – fisik, psikologis, sosial, sampe akademik.
“Dunya kampus musti katong mangarti akang sebagai ajang bentuk karakter, asah skill, tambah wawasan, deng bangong jejaring,” bilang Pak Wali Kota.
Ia kase inga mahasiswa par lebe mandiri, kritis, dan bisa ambe kaputusang dewasa. “Manfaatkan kuliah jadi bakal masa depan. Fokus di jurusan yang dong su pilih, jaga komitmen par abis kulia tepat waktu,” pungkasnya.
Acara tambah rame dengan stand up comedy dari Raja Majapahit, konten kreator asal Ambon, dan pembacaan puisi oleh Eko Saputra Poceratu yang biking suasana tamba hidop. (Leo)
