AmbonVibes.com – Angkatan Muda Gereja Protestan Maluku (AMGPM) Daerah Pulau Ambon su bale kumbali biking Lomba Lintas Alam & Fotografi, Jumat (5/9/2025). Agenda sabang taong ini bukang cuma par uji fisik dan kekompakan, mar juga ajak peserta lebe kalesang deng alam sekitar.
40 Tim Iko, Rute Nae Turung Bukit
Acara ini par mamggurebe Piala Wali Kota Ambon dan Ketua Klasis GPM Pulau Ambon ini diikuti 40 tim dari berbagai cabang AMGPM. Tahun ini, panitia dipercayakan ke Cabang Hermon, dan ini dong su biking lomba par sapuluh kali.
Panitia ator peserta ambe Start dari Gareja Sersing, tiap tim 7 orang. Dong musti Iko rute 13 km nae bukit-bukit pelayanan Jemaat Sersing sampe Kezia. Ada 7 pos deng tantangan seru: mulai dari labirin gambar, susun kata, jaring laba-laba, estafet bola ping-pong, piramida cup, sampe kuis Alkitab dan soal AMGPM.
Di pos paleng laste, tim haros lapor kondisi, jumlah tanda panah, dan jumlah sampah yang dong kumpol akang sepanjang jalan. Jadi, selain olahraga, juga kalesang bumi.
Bukan Sekadar Lomba, Tapi Juga Jaga Lingkungan
Ketua AMGPM Dapua Ruddy Rehatta bilang lomba ini bukang cuma rutinitas mar ada pung misi besar.
“Katong mau kader AMGPM lebe deka deng alam. Deng cara ini, katong balajar jaga hutan, lahan, dan daerah resapan air yang makin bakurang tagal banya dapa pake par tampa-tampa rumah,” jelasnya.
Menurut Ruddy, lomba ini mungkin seng heboh event kota biasanya, mar akang pung manfaat paleng basar. “Bukan cuma olahraga, mar edukasi lai. Anana muda bisa lia langsung pentingnya alam par karong pung hidop,” tambahnya.
Seru, Cape, Tapi Puji Tuhan Sampe Finish
Salah satu peserta dari Cabang Sumber Kasih Susana Lekiohapy (20), carita dia pung tim.
“Cape, mar seru paskali! Puji Tuhan, katong samua bisa sampe finish deng salamat,” ungkap Susana.
Dia jua kase semangat par kader AMGPM laeng par tetap kuat, jalang sesuai kehendak Tuhan, deng selalu andalkan Dia dalang sagala hal.
Acara ini kas jelas kalo semangat ana muda AMGPM bukang cuma soal kegiatan rohani, tapi juga aksi nyata jaga alam dan tanam nilai kalesang lingkungan par masa depan. (Piere)
