AmbonVibes.com – Universitas Pattimura (Unpatti) deng Institut Teknologi Bandung (ITB) biking aksi nyata di pesisir Teluk Ambon. Hari Selasa (2/9/2025), dorang turung langsung tanang ratusan bibit bakau di Desa Waiheru, Kecamatan Teluk Ambon.
Kegiatan ini seng cuma tanang pohon, mar juga jadi pelajaran par siswa SMA di Ambon.
Matematika Itu Hidup, Bukan Cuma Rumus
Dosen Matematika ITB Dr. Ikha Magdalena, jabat ketua tim. Sebelum tanam bakau, dia kase materi ke siswa soal peran matematika dalang kahidupan harhari.
“Matematika itu hidop, bukang cuma angka. Akang bisa bantu katong bapikir tajang, ambe kaputusang, sampe desain bangunan par jaga pante. Jadi, apa yang dapa ajar di kalas itu bisa pake akang par hal nyata, termasuk jaga lingkungan,” jelas Ikha.
Tanam Mange-Mange Deng Masyarakat
Habis edukasi, tim ITB deng Unpatti bagabung deng siswa dan masyarakat tanam bibit mange-mange di pante Waiheru.
Dong taruh harap, pohong mange-mange bisa cegah abrasi, biking bae ekosistem, deng biking orang muda lebe sadar par jaga alam.
“Ini seng cuma simbol saja, mar langkah nyata yang Katong harap bawa hasil bae par waktu panjang jaga pante Ambon,” tambah Ikha.
Akademisi deng Lingkungan Baku Gandeng
Lewat program ini, ITB deng Unpatti mo kase tunjuk bahwa kampus bisa karja sama deng masyarakat par jaga bumi.
Aksi kecil kayak tanam mange-mange mangkali lia biasa-biasa sa, mar akang pung dampak bisa basar di belakang hari, bae par ekosistem pinggir pante deng kase bangong anana muda par cinta lingkungan. (Leo)
