AmbonVibes.com – DPD KNPI Provinsi Maluku angka suara karas. Dong bilang, TNI deng Polri jang coba iko campur dalam urusan dunya kepemudaan di Maluku.
Wakil Sekretaris DPD KNPI Maluku Yanter Latumahina bilang bagitu tagal ada video yang tasiar, akang pung isi ada sekelompok orang yang mangaku pemuda Maluku bicara soal perdamean. Video itu dong sindir tagal dapa bayar Rp250 ribu per orang.
Video Disebut Cuma “Settingan”
Menurut Latumahina, kalo belanar ada yang dapa bayar cuma Rp250 ribu par bicara atas nama pemuda Maluku, itu pelecehan basar.
“Kalo cuma mau dapa bayar Rp250 ribu, itu kerdil paskali. Di tampa laeng, aktivis turung ka jalang basuara lawang ketidakadilan. Di Maluku, malah ada yang jual diri deng uang recehan,” tegas Latumahina, yang juga dosen Universitas Pattimura.
Ia bilang, video itu bukang cuma biking malu-malu, mar juga kase sanksi sosial par orang-orang yang iko terlibat. Bahkan dalam video itu, dapa lia ada yang mangaku perwakilan OKP, ada aparat TNI/Polri, sampe ada lae yang pake atribut ojek online.
Sentil Kapolda Maluku
Latumahina biking inga, Maluku ini bukang panggung sandiwara yang bisa dong ator-ator Iko dong pung mau. Khusus par Kapolda Maluku yang baru, Latumahina bilang lebe peka baca psikologi masyarakat.
“Jang sampe polisi iko maeng dalang skenario yang justru biking publik ilang rasa parcaya,” ujar Latumahina.
Pemuda Harus Berdiri Sendiri
Di bawah kepemimpinan Faisal Hayoto dan Almindes F. Syauta, KNPI Maluku bicara tegas, dunnya kepemudaan jang sampe jadi alat politik praktis.
“Pemuda itu bukang ana popi. Jang coba-coba main api di dunia kepemudaan,” tutup Latumahina. (Leo)
