AmbonVibes.com – Jalan nasional di Batu Koneng, Teluk Ambon, akang masih pono deng material longsor. Sampe Jumat (29/8/2025), tim dari Satker Wilayah I Balai Pelaksanaan Jalan Nasional (BPJN) Maluku masih sibuk biking kas barsih tana deng dan batu yang turung dari tebing.
Pantauan AmbonVibes.com, petugas ada yang keruk material, ada juga yang ator lalu lintas par mobil-motor tatap bisa lewat.
“Iyo, sampe siang ini petugas masih karja di lokasi,” bilang Kasatker Wilayah I BPJN Maluku Abdul Hamid Payapo alias Mito.
Longsor Kumbali Tagal Ujang Basar
Longsor pertama kali terjadi Sabtu (16/8/2025). Malang itu juga, tim BPJN langsung turung tangang biking penanganan darurat, apalae waktu itu mo maso HUT ke-80 RI.
Mar tagal ujang basar karena masih turung tarus di Ambon, longsor akang jadi kumbali. Untung seng ada korban jiwa.
“Material yang sakarang katong kas barsih itu dari longsor yang jadi kumbali. Ada yang katong keruk trus timbun di samping jalang par tahang tebing, ada juga yang su dapa bawa pake dump truk,” jelas Mito.
Mito seng lupa bilang danke par mantan Bupati Maluku Tengah Tuasikal Abua, yang bantu turunkan tiga unit dump truk supaya pengangkutan material bisa lebih cepat.
Penanganan Darurat & Rencana Jangka Panjang
Menurut Mito, penimbunan material di pinggir jalang itu memang langkah darurat par tanah seng tambah gerak.
“Kalo semua katong angkut, dengan cuaca begini, pas hujan bisa bikin tanah tambah labil, jadi tahang dolo, baru nanti pas cuaca su panas baru katong maso biking bae permanen,” jelasnya.
BPJN Maluku juga su baku ator deng Pemkot Ambon. Akang pung rencana bakal ada FGD lintas sektor cari solusi jangka panjang par lokasi Batu Koneng ini.
“Pak Wali Kota su setuju, nanti biking forum itu par samua pihak bisa kase masukan,” pungkas Mito. (Piere)
