AmbonVibes.com, Ambon – Aparat bageang Profesi dan Pengamanan (Propam) Polda Maluku su tahang satu anggota polisi. Dia pung nama Briptu MHL, tampa tugas di Ditpamobvit Polda Maluku.
MHL diduga langgar disiplin tagal selingkuh, zinah, deng kas talamberang bini-ana.
Polda Maluku Marinyo Kombes Pol. Rositah Umasugi, S.I.K, bilang kasus ini su gelar parkara. Akang sakarang naik ka tahap dapa priksa.
“Dapa tahang ini bagitu sudah proses hukum internal. Polda Maluku seng tutu mata deng pelanggaran yang anggota biking,” jelas Rositah di Ambon, Rabu (27/8/2025).
Ditahan 20 Hari di Patsus
MHL sakarang dapa tahang di Tampa Khusus (Patsus) Bidpropam Polda Maluku selama 20 hari, mulai 26 Agustus sampe 14 September 2025. Oras ini, saksi-saksi jua ada dapa pariksa par bikin kuat penyidikan.
Kapolda Kase Inga: Jaga Integritas!
Rositah juga tambah, Kapolda Maluku su ulang-ulang kase inga anggota Polri jang biking hal takaruang sampe nama institusi jadi seng bai.
“Kapolda selalu bilang, jang coba-coba biking pelanggaran, biar kacil lae. Polisi pung tugas layani orang banyak deng integritas, bukang biking hal-hal yang langgar etika profesi,” tandasnya.
Polda Maluku pastikan, samua laporan tentang anggota pasti dapa kas tarus deng terbuka sesuai atorang. (Keket)
