AmbonVibes.com, Ambon – Polisi masih tarus buru pelaku yang bakar orang-orang pung rumah di Hunuth, Kecamatan Teluk Ambon, yang kejadian Selasa (19/8/2025). Sampe oras ini, su 18 saksi dapa pariksa.
“Balong dapa pelaku, kasus ini masih dikembangkan. Su 18 orang saksi dapa periksa,” jelas Kabid Humas Polda Maluku Kombes Pol. Rosita Umasugi, di Ambon, Selasa (26/8/2025).
Dari Tawuran Pelajar, Berujung Bakar Rumah
Rosita bilang, kasus ini awalnya dar tawuran pelajar sampe biking maninggal satu siswa SMK Negeri 3 Ambon berinisial AP. Dari situ, bentrokan melebar sampe akhirnya ada rumah-rumah warga yang kena bakar.
Warga yang rumahnya terbakar seng terima dan langsung lapor ke Polda Maluku. Polisi turun capat di Tempat Kejadian Perkara (TKP) par kumpul bukti deng mulai proses penyelidikan.
14 Rumah Angus, 18 Rusak
Dari hasil olah TKP, ada 14 rumah angus tabakar, dan 18 rumah lain rusak. Satu dua tampa usaha warga juga iko jadi korban.
Rosita bilang, samua saksi yang dapa pangge, su dapa pariksa sarius par kumpul bukti-bukti valid. “Sampe sakarang penyidik masih tarus biking pengembangan, par bisa ungkap sapa yang terlibat dan apa motif di balik ini samua,” ujarnya.
Polda Maluku pastikan, kasus ini nanti dapa urus bae-bae secara profesional dan transparan, sesuai hukum yang berlaku. (Leo)
