Basudara, tuang hati jantong! Tabea!
Ambon Vibes sakarang su ada par samua. Bae ana pranggang bar garser, bae calakate, sampe su masa pohong. Bae di kampong-kampong deng kota, bae deka deng jau di tana orang.
Isi Ambon Vibes sangaja pake Bahasa Ambon. Bahasa Ambon memang top. Samua orang suka. Dar dolo, seniman-seniman Ambon piara Bahasa Ambon dalang lagu-lagu. Jadi, bukang cuma di Ambon sa, maar sampe antero dunya su kanal Bahasa Ambon.
Bahasa Ambon memang sadap. Sagala macang kata baku tacampor. Kata-kata Bahasa Uliase, su baku baku tacampor dengan kata-kata Portugis, Balanda, Arab, Cina, Melayu, deng Bahasa Indonesia.
“Kalo matahari su mo maso, anana stop balari jua. Strat di muka jalang akang seng bae tagal oto kaluar-maso karja ongko pung fanderen”
“Muder deng vader su stori banya, ose jang onosel. Seng bisa main di kintal saja? Mangapa haros di strat. Lama-lama baku tarek deng tamang-tamang lalu turun sampe stamplat. Skang botol manci loku ramas gargantang langsung flau, tidor sondor sono”.
Dua alinea di atas hanya contoh ucapan harhari di Ambon. Kalo pariksa bae-bae, maka bisa dapa lia sagala bahasa su tacampor. Itulah Bahasa Ambon yang paleng mestizo.
Kata “mestizo” (mestiza, mestizos) ini akang dari Bahasa Spanyol. The Editors of Encyclopaedia Britannica kase penjelasan di britannica.com, mestizo itu orang-orang yang pung darah tacampor.
Britannica bilang, di Amerika Tengah dan Selatan, mestizo itu par orang darah campuran Indian dan Eropa. Di Ekuador, mestizo itu bukan cuma darah saja maar juga sosial deng budaya. Jadi, Indian pung darah murni maar bapake baju dan iko adat Eropa, itu juga mestizo (atau cholo). Di Filipina, mestizo itu darah campuran asing deng pribumi, misalnya Tionghoa deng Filipina.
Di Indonesia, komunitas mestizo pertama terbentuk di Ternate. Oras itu tahun 1512, Sultan Bayanullah kirim Samarau dari Klan Tomagola jemput Fransisco Serrao di Ambon. Serrao deng dia pung ana bua ada tinggal di Pulau Tiga. Raja Hitu kase izin tinggal di situ, tagal rombongan Serrao pung kapal tinggalang di Lucipara. Untung bae, Orang Bajo datang ke Lucipara lalu muat Serrao ka Ambon.
Di Ternate, Sultan Bayanullah tarima Serrao dengan sagala hormat. Dong ansprak karja sama jual-beli cengkeh-pala. Selain jadi pos dagang, Serrao dapa angka jadi penasehat keraton. Nah, Serrao menikah dengan nona Ternate. Menurut Adnan Amal, inilah keluarga mestizo pertama di Nusantara.
Jang heran, sejarah dolo-dolo su amper 500 taong ini, akang pung hasil, Maluku paleng mestizo. Liat orang Maluku pung fam-fam saja, de fretes, de Silo, de Queljue, de Jong, de Lima, de Kock, van Harling, van Room, van Keken, Bremmer, Gomies, Alfons, Diaz, Gasperzs, Souisa, Cappenberg, Muskita. Baadilah, Assagaff, Alkatiri, Tanimena, Tanasal, Lauhata, Rentanubun, Theodorus, Thema. Ada lai marga yang laeng di Ambon macang Bugis, Semarang, Makassar, Yogyakarta, Palembang, Ambon, Ternate.
Jadi, mestizo par Maluku deng Ambon, itu hal darah dalang badan yang baku tacampor dengan darah luar. Darah Alifuru su tacampor darah Portugis, Balanda, Arab, Tionghoa, deng laeng suku, laeng bangsa.
Di luar itu, maski seng samua orang Maluku darah tacampor dan benar masih asli darah Alifuru, mestizo juga soal budaya. Orang luar deng orang Alifuru baku dapa, bergaul, hidup sama-sama, selain baku kawin, juga baku tukar budaya. Bahasa, busana, makanan, tarian, nyanyian, alat musik, sagala macang dari luar, jadi budaya baru.
Tari katreji, tari orlapey, tari lenso, baniang, kabaya dansa, ukulele, hawaiian, sampai bahasa, samua itu bagian dari kebudayaan, yang kena pengaruh Portugis dan Balanda. Orang Ambon punya kreasi lalu akang tabale jadi khas Ambon.
Kata “sena anggale” dalam komando tari katreji, akang muncul lai dalam hidop harhari.
“Os basena trus, seng urus kabong yo!”
“Sena anggale” akang dari “English Chain”. Ini Bahasa Inggris par bilang rante basar for jangkar kapal. Orang Portugal seng ambe kata”chain” jadi dong coba bilang chain, chano, chena. Nama “Inggris” dalam Bahasa Portugal akang tulis Ingles.
Dari kata itulah Chana Ingles jadi sena anggale. Komando katreji ini par setiap pasangan dansa taputar di tampa. Samua penari bikin bentuk rante.
Nah, kata “sena anggale” dibuat oleh orang Ambon. Jadi kalo bale tanya di Inggris, Portugis, Spanyol, Balanda, apa itu “sena anggale?” Dong seng bisa jawab tagal dong seng tau.
Di Maluku dan Maluku Utara, selain Bahasa Ambon, masih ada lebih 700 bahasa ibu yang hidop. Samua bahasa itu dalam bahaya tagal orang yang stori tiap bahasa seng sampe 1 juta orang. Samua bahasa ibu sangat penting deng mahal. Sapa bisa bicara bahasa kampong-kampong, itu talalu cerdas dan mewah.
Su banya program par biking hidop bahasa ibu di Maluku dan Maluku Utara. Riset su banya lae, diskusi, bacarita, komen-komen, su banya lae. Nah, Ambon Vibes pilih Bahasa Ambon jadi bahasa pengantar. Katong harap, ana-ana muda yang bisa bahasa apa saja dari 700 lebe itu, bisa bikin tulisan pake dong pung bahasa lae. Biar semua baku pegang tangan, lah maju sama-sama.
Katong harap, Ambon Vibes bisa dapa tarima deng bae. Katong open-open saja satu deng laeng. Kalo Ambon Vibes ada bikin bae, itu par katong samua pung bae. Kalo basudara rasa, ada yang kurang pas, kurang sreg, tolong kase tau jua.
Paleng laste, katong baku pegang tangang, angka suara deng Ambon Vibes biking bae Bahasa Ambon. Bagus kalo katong iko jargon Badan Bahasa yang terkenal: “Utamakan Bahasa Indonesia, Lestarikan Bahasa Daerah, Kuasai Bahasa Asing”.
Tabea!
Ambon, 26 Agustus 2025
