AmbonVibes.com – Upacara Hari Jadi ke-450 Kota Ambon baru abis biking di Lapangan Merdeka, Senin (8/9/2025) pagi. Jam 09.30 WIT acara mulai, suasana langsung rasa laeng-laeng. Samua pejabat datang pake baju adat Ambon. Upacara bajalang jua pake Bahasa Ambon.
Prosesi Adat Bikin Bangga
Acara mulai, dong buka deng baca sejarah lahir Kota Ambon. Orang-orang yang hadir dengar serius, tagal akang biking inga perjalanan kota yang top deng nama “Ambon manis e”.
Abis itu, pasukan yang bawa pataka Kota Ambon pi kase akang ka tangang Upulatu Upacara. Lanjut deng nyanyi lagu Mars Kota Ambon, heningkan cipta, sampe doa pa para leluhur dan orang-orang yang su bangun kota ini dari dolo-dolo.
Aroma adat dapa rasa kancang paskali. Banya orang, bilang upacara kali ini biking bulu nyawa badiri, deng tambah bikin bangga jadi orang Ambon.
Wali Kota: Baku Keku, Bukan Baku Kuku
Dalam sambutan, Wali Kota Ambon Bodewin Wattimena bilang, katong samua musti angka nae syukur tagal Tete Manis masih jaga Ambon sampe bisa dapa umur 450 tahun.
Tema tahun ini, “Bagara Sama-Sama Par Ambon, Maluku, dan Indonesia Pung Bae”, jadi ajakan par masyarakat bersatu masohi bangung kota.
“Ambon seng bisa maju kalo cuma karja satu orang. Harus sama-sama, baku tolong-menolong, karja sesuai peran. Kalo katong bisa baku keku, bukang baku kuku, Ambon pasti jadi lebih bae,” kata Bodewin.
Momentum Jaga Persaudaraan
Ia tambah, HUT ke-450 jangan cuma dilihat sebagai acara seremonial. Lebih dari itu, momentum ini harus dipakai untuk jaga persaudaraan dan bikin kolaborasi lebih kuat demi Ambon ke depan.
“Ambon harus torang rawat bukan cuma untuk hari ini, tapi untuk anak cucu nanti,” tutup wali kota. (Leo)
