AmbonVibes.com – Irama jukulele biking suasana jadi rame di Aula Katolik Center, Sabtu (30/8/2025). Ada 15 peserta dari samua kecamatan di Ambon datang tampil dalam Amboina Jukulele Festival 2025. Tujuan utama acara ini jelas: Jaga, rawat, dan tarus biking majo Ambon Kota Musik Dunia.
Bukang cuma suara jukulele saja yang dapa dengar mar ada lae nyanyian, tarian, sampe trompet. Lebe rame lae tagal yang nae panggung anana kacupeng, pranggang sampe yang calakate. Dari situ bisa dapa lia, musik memang hidop di tengah-tengah masyarakat.
Musik Jadi Identitas Ambon
Sejak 31 Oktober 2019, UNESCO su kase pengakuan resmi: Ambon bagian dari Jejaring Kota Kreatif Dunia di bidang musik. Itu jadi kebanggaan basar, mar juga tanggung jawab bersama.
Sekretaris Kota Ambon Roby Sapulette yang buka festival atas nama Wali Kota bilang, acara ini bukan sekadar hiburan.
“Ini bukang cuma par tampil-tampil saja, mar juga panggung budaya dan bukti nyata komitmen katong par bikin Ambon lebe beken sebagai Kota Musik Dunia, bae di Indonesia maupun di luar negeri,” kata Roby.
Ia tambah, donci su jadi bagian dari napas hidop orang Ambon.
“Ambon bukan cuma cinta musik, mar hidop deng musik. Musik ada dalang darah katong,” jelasnya.
Jukulele, Simbol Ceria dan Damai
Roby juga biking inga, jukulele itu alat musik yang paleng deka deng hidop harhari orang Maluku.
“Jukulele ini simbol keceriaan, kebersamaan, dan perdamean. Dari festival ini katong mo Kase unju bahwa musik itu bahasa dunya yang bisa biking satu katong samua, deng sondor lia umor, agama, deng budaya,” pungkasnya.
Harapan ke Muka
Festival jukulele ini dong harap bukang cuma jadi panggung ekspresi, mar juga bisa bawa samangat orang basudara, baku sayany, deng rasa bangga par donci Ambon.
Seng mustahil, dari festival ini gema musik Ambon bisa tamba karas, bukang saja di Maluku atau Indonesia, mar sampe ka dunya luar. (Piere)
