AmbonVibes.com – Proyek pambangunan sarana deng prasarana aer barsih Pulau Haruku deng nilai sakitar Rp12,4 miliar kumbali jadi rame. Satu pajabat lai dapa bawa maso bui. Tokoh itu Mahumahat Marasabessy alias Mat (MM), bakas Kapala Dinas Pekerjaan Umum dan Penataan Ruang (PUPR) Provinsi Maluku. Dia resmi jadi tarsangka sakaligus dapa tahang dar panyidik Pidana Khusus (Pidsus) Kejaksaan Tinggi (Kejati) Maluku, Senen (31/8/2026).
Mat ini orang panting. Dia parnah dudu di kursi Penjabat Bupati Maluku Tengah. Mar dapa pariksa intensif di Kantor Kejati Maluku dari sakitar jam 12.00 WIT sampe sore. Reporter Ambonvibes.com lia di Kantor Kejati Maluku, Mat kaluar dar ruang pamariksaan sakitar jam 18.25 WIT.
Pamariksaan Mat ini barkaitan deng parkara dugaan tindak pidana korupsi pambangunan sarana deng prasarana aer barsih Pulau Haruku, Kabupaten Maluku Tengah, di Dinas PUPR Provinsi Maluku Taong Anggaran 2020. Dalang parkara ini, panyidik manduga tarjadi karugian negara sakitar Rp3,8 miliar.
Waktu kaluar dari pintu, Mar su pake rompi tahanan warnba oranye deng tulisan “Tahanan Kejati Maluku”. Mat pung dua tangang dapa borgol waktu dapa bawa ka oto tahanan yang su siap antar ka Rumah Tahanan Negara (Rutan) Kelas IIA Ambon.
Sondor ada parnyataan kaluar dar mulut Mat waktu wartawan ambur partanyaan takait panahanan. Bahkan waktu dapa tanya manganai informasi dugaan aliran dana yang takait deng nama Widya Ismail, Mat pilih tutu mulu.
Mat langsung maso dalang oto tahanan lalu oto pi ka Rutan Kelas IIA Ambon. Tarsangka Mat pung kuasa hukumn Muhammad Husein Marasabessy juga ada batamang salama proses pemeriksaan.
Husein bilang, dia pung klien tetap kooperatif iko proses hukum panyidik Kejati Maluku biking. Manurut dia, pamariksaan kali ini barlangsung sakitar ampa jam, panyidik tanya sakitar 50 soal.
“Tadi katong pung klien datang dar Jakarta, lalu hadir iko panggilan par dapa pariksa. Hari ini juga resmi jadi tarsangka, setelah dapa pariksa. Pertanyaan penyidik ada 50 pertanyaan. Yang paleng panting, katong pung klien paleng kooperatif,” kata Husein.
Husein bantah informasi yang bilang Mat sangaja manghindar panggilan panyidik Kejati Maluku. Ia bilang, pameriksaan tarhadap mantan Kadis PUPR Maluku itu bahkan su dalapang kali. Tagal itu, Husein deng tegas bilang, seng batul dia pung klien dapa bilang mangkir atau usaha manghindar proses hukum.
“Beliau baru dar Jakarta dan hari ini su dapa pariksa. Ini su dalapang kali antua dapa pariksa. Jadi informasi yang tasiar di media bahwa antua manghindar panggilan, itu seng batul. Antua su dalapan kali dapa pariksa dan salama ini kooperatif ,” ujar Husein.
Dalang pamariksaan tarakhir, panyidik mandalami sajumlah hal tarkait palaksanaan proyek pambangunan sarana deng prasarana aer barsih Pulau Haruku, tarmasuk dugaan panyimpangan dalang palaksanaan pakarjaan deng dugaan aliran dana par pihak laeng.
Posisi Mat dalang akang proyek, kata Husein, adalah pangguna anggaran waktu masih manjabat Kapala Dinas PUPR Provinsi Maluku. Sabage pangguna anggaran, Mat su bentuk tim par pantau tarhadap parkambangan pakarjaan di lapangan. Laporan progres pakarjaan dar akang tim jadi dasar par Mat tanda tangang sajumlah dokumen tarkait palaksanaan proyek.
“Antua sabage pangguna anggaran. Antua su bentuk tim. Tim ini dapa parcaya par pantau progres di lapangan. Waktu tim sampekan progres, antua lalu tekeng dokumen bardasarkan akang hasil laporan,” jelas Husein.
Namun, kuasa hukum bilang, Mat mengaku seng tau kondisi sabanarnya dar pakarjaan di lapangan. Husein sebut, dia pung klien baru tau kalo sarana deng prasarana yang dong karja ternyata balong bisa barfungsi sabagaimana haros.
“Antua seng tau kalo di lapangan tarnyata proyek itu balong bisa barfungsi sama sakali, tarmasuk ambulans,” kata Husein.
Parnyataan itu jadi bageang dar pembelaan Mat dalang manjalaskan posisi Mat sabage pangguna anggaran dalang proyek yang sakarang bawa Mar sabage tarsangka. Maski bagitu, proses hukum tarhadap Mat tetap bajalang. Panatapan tarsangka deng panahanan setelah panyidik abis pariksa Mat.
Deng nama Mahumahat Marasabessy maso, maka jumlah tarsangka dalang parkara dugaan korupsi proyek aer barsih Pulau Haruku jadi tujuh orang. Sabalong ini, Kejati Maluku su tahang anam tarsangka. Dorang itu masing-masing Fais Noval (FN) selaku kontraktor ato panyadia, AS selaku Pejabat Pembuat Komitmen (PPK) periode 16 November 2020 hingga 22 April 2021, NH alias Ella Sopalauw yang manjabat PPK sejak 22 April 2021 sampe pakarjaan selesai.
Ada lai AM salaku Pajabat Palaksana Teknis Kagiatan (PPTK) periode 16 November 2020 sampe 22 April 2021, serta NM selaku PPTK sejak 22 April 2021 sampe pakarjaan abis. Samentara satu tarsangka laeng itu DP salaku panyedia. Samua su iko proses hukum dan dapa tahang di Rutan Kelas IIA Ambon mopun Lapas Perempuan Ambon.
Sakarang, Mat iko dong anam. Mar akang perkara balong tabrenti di tujuh tarsangka. Penyidik Pidsus Kejati Maluku masih cari tau lebe dalang rangkeang palaksanaan proyek, mulai dar proses pakarjaan, dugaan panyimpangan sampe kamungkinan ada aliran dana par pihak laeng.
Dar nilai proyek mancapai sakitar Rp12,4 miliar deng dugaan karugian negara sakitar Rp3,8 miliar, pangusutan perkara ini masih kase sajumlah partanyaan yang sakarang ada di tangang aenyidik par ure akang lebe jao malalui proses hukum. Mat sandiri, malalui kuasa hukum, mangaku mo tarus kooperatif par samua proses. (Tim)
