AmbonVibes.com – Anggota DPRD Provinsi Maluku, Anos Yeremias minta aparat kepolisian, PT Pelindo, perusahaan angkutan kontainer, pemerentah daerah, deng samua pamangku kapentingan lakas biking evaluasi manyaluruh tarhadap pola operasional kendaraan kontainer di ruas jalang Kota Ambon.
Anos bilang akang par tanggapi tragedi di Simpang Al Fatah, Ambon, yang cilaka oto trek kontener yang biking sampe oma pejalan kaki lanjut usia tatabrak.
Manurut Anos, akang tragedi seng boleh lia akang deng sabalah mata sabage kacalakaan lalu lintas biasa. Paristiwa itu musti jadi momentum par evaluasi sistem pangawalan, pangaturan jam operasional, jalur yang mo pake, sampe kapatuhan pangamudi tarhadap batas kacapatan deng atorang lalu lintas.
“Paristiwa maninggalnya saorang pajalang kaki lanjut usia tagal tatabrak truk kontainer di kawasan Simpang Al-Fatah marupakan duka yang mandalam par katong samua. Beta iko berbelasungkawa par kaluarga korban. Samoga almarhumah dapa tampa yang bae tempat terbaik di sisi Tuhan Yang Maha Esa deng kaluarga dapa kakuatang deng panghiburan,” ujar Anos.
Dia tegaskan, kasalamatan masyarakat musti sabage prioritas utama dalang satiap aktivitas distribusi barang, tarmasuk waktu kandaraan kontener kaluar mopun kumbali ka kawasan Pelabuhan Yos Sudarso Ambon.
Anos minta Ditlantas Polda Maluku deng Satlantas Polresta Pulau Ambon dan Pulau-Pulau Lease biking evaluasi tarhadap sistem pangawalan kandaraan kontainer yang salama ini dong terapkan.
Akang Evaluasi, kata dia, musti mancakup pangaturan waktu kabarangkatan dan kapulangan kandaraan, rute yang dong pake, mekanisme pangawalan, deng pangawasan tarhadap kacapatan deng parilaku pangemudi salama ada di jalang raya.
Manurut Anos, masyarakat su cukup sering mangaluh cara sabageang oto trek kontener operasi di jalang raya, tarutama waktu kandaraan tonase basar malintas di ruas jalang sempit deng padat.
Anos juga sorot akang kondisi waktu truk kontener dapa kawal satu unit kandaraan Patwal, mar tetap laju deng kacapatan yang bisa biking bahaya pangguna jalang laeng
“Pangawalan lalu lintas pung tujuan biking kaamanan deng kalancaran, bukang biking kesan bahwa kandaraan tartantu bebas malaju sondor pikir kasalamatan pangguna jalang yang laeng,” tegas Anos.
Dia manilai, kaberadaan kandaraan Patwal harus jadi bageang dar sistem pangandalian kasalamatan, bukang sakadar buka ruang par kandaraan kontener untuk bagara lebe capat.
Tagal itu, dia minta Ditlantas Polda Maluku deng Satlantas Polresta Ambon pastikan sistem pangawalan banar-banar orientasi di kasalamatan seluruh pangguna jalang.
“Kasalamatan jiwa manusia musti jadi prioritas utama. Jang sampe kalancaran distribusi barang justru makang kasalamatan masyarakat,” ujar Anos.
Salaeng kapolisian, Anos juga minta PT Pelindo salaku pangelola kawasan palabuhan ambe langkah evaluasi deng kas kuat koordinasi deng perusahaan angkutan kontainer, kepolisian, pemerentah daerah, deng instansi teknis laeng.
Manurut, aspek kasalamatan seng boleh cuma jadi tanggong jawab pangamudi ato kapolisian, mar musti jadi bageang dar kasaluruhan rante distribusi logistik.
Mulai dar kandaraan kaluar dar kawasan palabuhan sampe bale ka Palabuhan Yos Sudarso, saluruh tahapan musti pung standar kasalamatan yang jelas.
“Kasalamatan masyarakat seng boleh kalah dar kalancaran distribusi barang,” kata Anos.
Dia juga bilang, bardasar pangatahuan dia, kacalakaan yang malibatkan kandaraan kontener sampe makang korban jiwa di Kota Ambon paleng kurang su dua kali.
Kasus partama, kata dia, tarjadi satu dua taong lalu di muka Markas Kodaeral IX Ambon. Sadangkan parkara kadua itu kacalakaan maut yang baru tarjadi di kawasan Simpang Al-Fatah.
“Bisa saja akang pung jumlah lebe dar itu, mar dua peristiwa ini yang beta tau,” ujar Anos.
Manurut Anos, kajadian-kajadian itu musti jadi bahan evaluasi serius par samua pihak. Pemerentah deng pamangku kapentingan seng boleh tunggu korban barikut par biking bae. Tagal itu, dia minta lakas ada evaluasi manyaluruh tarhadap sistem operasional kandaraan kontener di Kota Ambon.
Anos juga dorong ada informasi resmi par masyarakat manganai jam operasional trek kontener keauar dar Palabuhan Yos Sudarso, waktu kandaraan kumbali ka palabuhan, jalur yang mo pake, standar kacapatan, deng mekanisme pangawalan.
“Jang tunggu korban barikut baru pambenahan. Masyarakat Ambon pung hak pake jalang raya deng aman, nyaman, dan sondor rasa takut,” tegas Anos.
Dia harap tragedi di Simpang Al-Fatah jadi paristiwa tarakhir sakaligus momentum par mambangun sistem pangangkutan logistik yang lebe tertib deng aman.
Anos bilang, koordinasi antara kepolisian, PT Pelindo, parusahaan angkutan kontainer, pemerentah daerah, deng saluruh pamangku kapentingan musti dapa kas kuat par aktivitas distribusi logistik tetap bajalang sondor makang korban
masyarakat.
“Semoga paristiwa ini jadi yang tarakhir deng jadi momentum par samua pihak par biking bae sistem par kasalamatan masyarakat. Sebab, satiap oto kecelakaan maut yang menewaskan seorang pejalan kaki lanjut usia setelah tertabrak truk kontainer di kawasan Simpang Al-Fatah, Kota Ambon, menjadi alarm keras bagi sistem pengangkutan logistik di daerah ini. Nyawa manusia sangat barharga dan wajib katong lindung sama-sama,” pungkas Anos.
