AmbonVibes.com – Karja karas Pemerentah Kota Ambon par biking modern tata kelola parsampahan kumbali tatongka masalah. Hal itu bisa lia di sajumlah fasilitas barupa wastebin (tampa sampah basar) akang rusak parah tagal aksi vandalisme.
Wali Kota Ambon Bodewin Wattimena paleng kacewa deng akang. Manurut Bodewin, panyadiaan wastebin di sajumlah titik strategis marupakan langkah konkret pemerentah par biking gampang masyarakat buang sampah sakaligus jaga estetika kota.
“Niat bae pemerentah par biking bae palayanan parsampahan seng taiko deng kasadaran manjaga fasilitas. Sangat paskali, wastebin yang su tasadia justru dapa bakar,” ujar Bodewin, Kamis (12/3/2026) di Balai Kota Ambon.
Mananggapi insiden itu, Dinas Lingkungan Hidup dan Persampahan Kota Ambon (DLHP) sakarang ada kaji ulang panampatan fasilitas kabarsihan di wilayah tardampak.
Kepala DLHP Kota Ambon Apries Benel Gaspersz bilang, dong mo timbang-timbang kumbali lokasi itu masih layak dapa fasilitas sarupa kalo faktor kaamanan seng tajamin.
Menurut Apries, kaberadaan wastebin salama ini tarbukti bantu kas kurang sampah yang talamburang di sakitar pamukiman mopun kawasan sakolah.
“Sadikit banya, wastebin su cukup bantu warga di situ sampe seng ada sampah talamburang di jalan. Mar kalo hari ini dong bakar akang, bararti seng ada kasadaran jaga fasilitas yang pemerintah su sadia,” tegas Apries.
DLHP tegaskan, wastebin marupakan aset daerah yang bali pake uang rakyat sahingga kalo rusak, itu bararti nagara juga rugi.
Karena itu, Pemerentah Kota Ambon mangimbau masyarakat seng cuma jadi pangguna fasilitas publik, mar juga iko sabage panjaga.
Tanpa partisipasi aktif masyarakat par jaga dan awasi lingkungan, upaya paningkatan layanan parsampahan di Kota Ambon susah par dapa hasil maksimal. (red)
