AmbonVibes.com – Kapala Dinas Lingkungan Hidup dan Persampahan Kota Ambon Apries Gaspersz kas inga samua palaku usaha di Ambon par tanggung jawab jaga kabarsihan lingkungan di dia pung tampa usaha. Apries bilang akang di Ambon, Senen (9/3/2026).
Apries bilang, satiap palaku usaha wajib pastikan dia pung lingkungan usaha tetap barsih, iko katantuan Surat Pernyataan Pengelolaan Lingkungan (SPPL) yang harus kase maso ka DLHP.
Manurut Apries, kawajiban manjaga kabersihan lingkungan usaha juga mancakup panyadiaan tampa sampah yang mamadai di tampa usaha par sampah seng talamburang atau batumpuk.
“Satiap palaku usaha pung tanggong jawab jaga dia pung lingkungan usaha tetap barsih iko SPPL yang wajib kase ka DLHP, tarmasuk sadia tampa sampah yang mamadai di tampa usaha,” ujar Apries.
Apries tambahkan, katentuan itu juga sajalang deng edaran Wali Kota Ambon yang tegaskan, palaku usaha seng boleh tumpuk sampah di muka tampa usaha di pagi deng siang hari.
Manurut dia, kabiasaan tumpuk sampah di waktu yang seng sasuai, bisa ganggu kabersihan kota deng kanyamanan masyarakat. Salaeng itu, Pemerentah Kota Ambon juga terapkan sajumlah kabijakan tegas takait pangalolaan sampah di tampa usaha.
Salah satu kabijakan itu, pelaku usaha sadia tampa sampah mandiri di tampa usaha, deng sadia Alat Pamadam Api Ringan (APAR).
Pemerentah juga tegaskan par palaku usaha tanggong jawab tarhadap sampah yang muncol di dia pung lingkungan usaha dan seng kas biar sampah manumpuk ato talamburang.
Mulai taong 2026, pemerentah barlakukan denda administratif Rp1 juta par palaku usaha mopun masyarakat yang buang sampah sabarang dapa, di luar jam yang su ator, atau seng di akang pung tampa.
Salaeng itu, pemerentah juga biking panyasuaian retribusi sampah par parusahaan, industri, deng usaha mikro dan kecil par kase lebe efektif pangangkutan sampah di Kota Ambon.
Pemkot Ambon juga mandorong palaku usaha par kas kurang panggunaan kantong plastik, deng pilah sampah organik dan anorganik mulai dar akang pung sumber sabalong patugas kabarsihan angka akang.
Apries harap saluruh palaku usaha bisa patuh iko atorang par jaga kabarsihan dan kesehatan lingkungan di Kota Ambon.
“Mari sama-sama jaga Ambon tatap barsih deng sehat,” pungkas Kadis LHP Apries Gaspersz. (red)
