AmbonVibes.com — Akademisi Universitas Caritas Indonesia Yusty Foxdey Rahawarin angka suara par panagakan hukum dalang parkaran dugaan kakarasang barujung maut yang lama Veronika Rahanyanat, karyawati perusahaan mutiara PT Lik di Pulau Lik, Kabupaten Maluku Tenggara (Malra).
Manurut dia, parkara itu biking publik takajo, lebe-lebe akang jadi di Tanah Kei yang samua su tau paleng angka tinggi harkat deng martabat parangpuang.
“Parkara ini buka mata katong manganai panting paskali panagakan hukum yang tegas dalang mamberikan parlindungan tarhadap parangpuang, tsrutama di lingkungan karja,” ujar Yusry, Jumat (27/2/2026).
Alumnus Magister Hukum Universitas Pattimura itu kastau, regulasi di Indonesia su ator deng bae parlindungan deng hak-hak pakarja, tarmasuk dalang konteks kakarasang.
Dia nanaku Kitab Undang-Undang Hukum Pidana (KUHP) yang ator tindak kakarasang deng Undang-Undang Nomor 13 Taong 2003 tentang Ketenagakerjaan yang akang pung sabageang katantuang dapa kas baru malalui Undang-Undang Cipta Kerja.
“Satiap pakarja pung hak dapa parlindungan atas kasalamatan, kasahatang, deng dia pung martabat. Kakarasang fisik, verbal, mopunpun seksual di tampa karja jalas bartantangan deng prinsip itu,” tegas Yusry.
Maski bagitu, dia mangaku, dalang praktek, panagakan hukum seng jarang tatongka tantangan, mulai dar potensi impunitas palaku sampe stigma tarhadap korban.
Wakil Dekan II Fakultas Sains dan Teknologi Universitas Caritas Indonesia itu juga manilai dampak kakarasang di tampa karja seng cuma makang korban dan kaluarga sacara fisik mopun psikologis, mar juga Iko bawa pangaruh par produktivitas Deng reputasi perusahaan.
“Suasana karja yang seng aman akang biking karyawan rasa dapa tekan deng seng nyaman, jadi akang biking seng Bae dong pung kinerja. Karena itu, dugaan panganiayaan di tampat karja seng boleh lia deng mata sabla,” ujar Yusry.
Manyangkut rilis resmi Polres Maluku Tenggara yang bilang su pariksa 13 saksi lalu biking kesimpulan korban maninggal dunya tagal saki, bukang tagal kakarasang, Yusty manilai akang bisa biking muncol polemik kalo seng uros akang deng bae deng tabuka.
“Bardasarkan hasil pamariksaan, polisi biking kasimpulan korban maninggal dunya tagal saki, bukang tagal dapa kakarasang. Akang jadi sorotan publik, sahingga harap paskali pihak barwenang musti ambe sikap tegas dalang manangani parkara ini,” tandas Yusty.
Dia manakankan panting paskali proses hukum yang capat, transparan, deng akuntabel par kase rasa kaadilan par korban deng kaluarga. Dia juga dorong par dalang gelar parkara, pihak kaluarga dapa pandamping kuasa hukum ato Lembaga Parlindungan Saksi dan Korban (LPSK).
“Proses hukum yang capat deng transparan akang kase rasa kabanaran deng kaadilan par korban, sakaligus parlindungan hukum tarhadap kaluarga deng pihak-pihak yang bantu ungkap dugaan panganiayaan barujung kamatian ini,” ujar Yusty.
Yusty ajak samua pihak par seng cuma bicara manganae kaadilan, mar musti biking dalang kahidupang nyata.
“Mari katong komitmen bahwa tindakan kakarasan seng dapa toleransi, tarutama takait komitmen karong tarhadap parlindungan hak asasi manusia,” pungkas Yusty. (Vera)
