AmbonVibes.com — Desakan par aparat panegak hukum tegas dalang parkara panganiayaan dua ana pranggang di Kabupaten Maluku Tenggara tarus manguat. Anggota DPRD Maluku Yunus Serang minta Bripka Masias Siahaya dapa hukum barat deng maksimal, tagal dugaan kakarasang yang bikin satu korban maninggal deng satu patah tulang.
“Ini paleng keji deng biadab. Bagemana bisa sorang aparat panegak hukum malawan ana skola yang jalas-jalan bukang lawan sabanding. Hukuman barat maksimal musti kase par oknum itu,” tegas Yunus di Ambon, Sabtu (21/2/2026).
Manurut Bakas Wakil Bupati Malra itu, paristiwa tragis itu mancarminkan arogansi aparat dan jadi preseden buruk par panagakan hukum di Maluku. Tagal itu, sanksi yang kase par dia seng boleh stengah-stengah deng musti kase efek jera par eso-eso seng taulang kumbali.
Yunus manilai tindakan Bripka Masias Siahaya bukang sakadar pelanggaran pidana, malaengkan su palanggaran hak asasi manusia, deng seng pas kode etik kepolisian dan KUHP. Dia bahkan mandorong par palaku dapa hukum bui saumur hidop.
“Ini bantuk tanggong jawab atas kagagalan aparat dalang manjamin kasalamatan warga, lebe khusus anana sabage generasi panarus bangsa,” ujar Yunus.
Salaeng hukuman pidana barat, Yunus tegaskan, pecat sondor hormat, PTDH, musti jadi konsekuensi etik yang seng bisa dapa tawar lae. Yunus juga minta sidang kode etik biking akang tabuka sabage wujud komitmen reformasi di tubuh Polri.
“Proses etik musti transparan. Publik pung hak par tau bagemana institusi manindak dia pung anggota yang langgar hukom,” kata Yunus.
Sabagemana su jadi barita viral, Bripka Masias Siahaya bartugas di Mako Brimob Pelopor C. Dia dapa sangka pukul ana skolah di Maluku Tenggara Arianto Tawakal (14), sampe mandi darah, lalu maninggal dunya. Dia juga biking sampe Nasrim Karim (15), korban pung kaka, patah tulang.
Tagal paristiwa itu, Yunus dorong rekonsiliasi sebage bageang dar tanggung jawab moral institusi. Dia manilai komandan brimob wajib pi baku dapa kaluarga korban par minta maaf langsung.
Lebe jao, Yunus bilang negara malalui lambaga takait musti kase pamulihan manyaluruh par kaluarga korban, mulai dar pandampingan psikologis jangka panjang, rehabilitasi medis, jaminan pendidikan, sampe kase restitusi atau kompensasi yang layak.
“Negara seng boleh cuma barenti di hukum palaku, mar juga wajib kas hadir kaadilan yang utuh, tarmasuk pamulihan sosial deng mental par kaluarga korban,” tegas Yunus.
Yunus juga tegaskan, paristiwa itu marupakan palanggaran Undang-Undang Parlindungan Anak seng bisa kase banar dalang bantuk apa saja.
Dia tambahkan, pangungkapan panyebab kematian korban musti transparan dan akuntabel.
“Hak anak yang maninggal dunya seng wajar adalah dapa kajalasang panyebab kamatian par anak seng dapa stigma negatif,” tandas Yunus. (keket)
