AmbonVibes.com — Ada kabar bae par warga Ambon di Kudamati Atas, Farmasi, Gunung Nona, Kezia, sampe Benteng Atas (Bentas). Su seng lama lai, samua pung susah tagal kakurangan aer barsih akang linyap. Pasalnya, Pemkot Ambon samantara biking hidop kumbali mata aer yang bisa layan lebe dar 4.000 kapala kaluarga (KK) di tampa-tampa susah aer itu.
Pemkot Ambon memang pung komitmen par biking gampang akses aer barsih par warga samua. Lia sa, Wali Kota Ambon Bodewin Wattimena, bar abis kas dudu batu partama revitalisasi fasilitas sumber aer Perumda Tirta Yapono di Wainitu, Kamis (15/1/2026)
Wali Kota Ambon Bodewin Wattimena bilang paleng rasa syukur par aer Wainitu. Dia bilang, kapasitas aer di tampa ini paleng banya bantu pemerentah par bisa jangkau warga yang salama ini balong rasa layanan aer barsih bae-bae.
“Katong barsyukur, dar sumber air ini, lebe 4.000 KK di Kota Ambon bisa dapa layan. Kalo katong pung dua ato tiga sumber aer lai macang ini, akang pasti mampu jangkau samua warga Kota Ambon yang balong dapa akses aer barsih,” ujar Wattimena.
Manurut Wali Kota Bodewin, panyadiaan aie barsih marupakan kabutuhan dasar yang haros dapa jamin dari negara, tarmasuk pemerentah daerah.
Wali Kota tegaskan, Pemkot Ambon seng akan barenti di satu sumber aer sa. Dia su kase instruksi par Direktur Perumda Tirta Yapono lakas cari potensi sumber aer laeng, tarmasuk par kawasan bagian atas Kuburan Benteng.
Pemkot ambe langkah ini par jamin kabarlanjutan pasokan air barsih, tarutama par warga yang tinggal di wilayah pagunungan.
“Katong jua mo lihat PDAM pung sumur-sumur bor, tarmasuk di Halong. Harapan katong, dar semua upaya ini, program prioritas Wali Kota dan Wakil Wali Kota Ambon nomor satu, yakni akses aer barsih par masyarakat, dar waktu ka waktu tarus kas lia parkambangan positif,” jelasnya.
Bodewin tambahkan, katarsadiaan aer barsih bukang sakadar soal teknis, mar ini manyangkut kualitas hidop masyarakat.
Takait kabarlanjutan sumber aer Wainitu, Bodewin bilang, debit aer relatif stabil dar taong ka taong. maski ada taturung sadiki kalo pas musim kamarau. Maski bagitu, dia tegaskan pemerentah seng ingin bagantong cuma di satu sumber aer.
“Kalo cuma bagantung di satu sumber aer, satu waktu klak akang bisa badapak. Tagal ini, katong tarus mo cari sumber-sumber aer baru,” katanya.
Bodewin apresiasi jajaran Perumda Tirta Yapono par dong pung kinerja deng dedikasi par layan kebutuhan aer barsih warga Kota Ambon.
Wali Kota juga singgung krisis aer bersih yang tarjadi di wilayah konsesi PT DSA, khususnya di kawasan Karang Panjang, Batu Merah, deng Pandan Kasturi.
Dia bilang, bae pemerentah bae swasta yang kalola aer barsih musti tanggong jawab fol-fol par palayanan masyarakat.
“Har ini krisis aer barsih di Batu Merah. Su sabulang lebe, warga seng dapa aer barsih. Sabage Wali Kota, beta minta PT DSA lakas ambe langkah deng capat proses parbaikan jaringan,” tegasnya.
Bodewin bilang, kalo seng ada itikad bae, Pemkot Ambon mo ambe langkah hukum.
“Kalo seng, Pemkot mo gugat PT DSA tagal seng biking palayanan yang bae par masyarakat,” ujarnya.
Sabage bantuk kapadulian par masyarakat yang kana dampak, Pemkot Ambon sakarang ada operasi ampa unit mobil tangki aer par distribusi aer barsih gratis.
“Mangkali seng bisa bantu samua, mar katong su kas turung ampa mobil tangki par tarus bage-bage aer barsih, deng harapan dapa biking ringang beban masyarakat salama krisis ini,” tambahnya. (Loe)
