AmbonVibes.com — Anggota DPRD Provinsi Maluku dari Daerah Pemilihan (Dapil) Kabupaten Maluku Tengah Alhidayat Wajo mandesak manajemen RSUD Masohi par lakas ambe langkah tegas par parkara dugaan malpraktek medis ada rame jadi sorotan publik.
Wajo bilang, rumah saki milik pemerentah daerah itu musti biking evaluasi manyaluruh terhadap sistem palayanan dan prosedur penanganan pasien par kasus sarupa seng taulang kumbali.
“Kaluhan masyarakat tarhadap palayanan RSUD Masohi bukang bar kali ini. Ini su paleng lama dan sakarang muncul kumbali dugaan malpraktek yang tantu harus ambe sikap sarius,” kata Wajo par wartawan di Ambon, Kamis (8/1/2026).
Menurut Wajo, manajemen RSUD Masohi seng boleh tutu biji mata par samua laporan masyarakat. Dia nilai, parsoalan ini manyangkut orang pung nyawa jadi seng boleh urus akang stenga-stenga.
“Katong seng bisa anggap enteng masalah ini. Kaluhan masyarakat su datang ulang-ulang, dan sakarang muncul dugaan malpraktek. Manajemen rumah saki wajib biking parbaikan manyaluruh,” tegasnya.
Dia juga minta satiap keluhan warga musti ada tindak lanjut sacara profesional Deng transparan. Manurut Wajo, respons yang lamban ato seng jalas justru akang biking basar karaguan publik tarhadap kualitas palayanan kesehatan di Kabupaten Maluku Tengah.
“Satiap kaluhan haros jadi prioritas. Masyarakat pung hak dapa jawaban yang jeaas deng pananganan yang tapat. Bahkan kalo nanti dugaan ini seng tabukti, proses pananganan yang transparan akang bisa bangong kumbali kaparcayaan publik,” ujarnya.
Wajo ungkapkan, salah satu hal yang paleng biking kawatir dalang kasus ini adalah kalangkapan rekam medis pasien yang ada dugaan, seng tacatat bae-bae.
Bardasarkan informasi yang dia tarima, saorang pasien manjalani prosedur pancabutan gigi, 2 September lalu. Mar, tiga hari barikot, pasien kumbali ka rumah saki deng kaluhan pandarahan dar talinga.
Kondisi ini, manurut Wajo, seng tacatat sacara lengkap dalang catatan medis resmi.
“Kronologi medis yang seng utuh macang ini manjadi sumber kabingungan dan kacurigaan. Satiap parubahan kondisi pasien, tarutama pas abis tindakan medis, musti tacatat secara jelas,” kata Wajo.
Dia tambahkan, kalalaian dalang pancatatan bukang cuma biking susah evaluasi medis, mar juga buka ruang spekulasi di tengah masyarakat.
Wajo pun mandesak pihak RSUD Masohi par lakas Kase klarifikasi tabuka takait parkara cabu gigi ini, par jang akang jadi isu liar.
“Katong parlu panjalasan yang transparan. Mangapa kondisi pasien abis cabu gigi seng tacatat? Bagemana pananganan katika pasien bale deng kaluhan pandarahan? Samua ini musti jalas par publik,” tandasnya.
Dia tegaskan, DPRD Maluku siap lakukan pangawasan sakaligus kase dukungan par RSUD Masohi bisa biking beres sistem palayanan sacara manyeluruh.
“Harapan katong, deng langkah yang tapat, kualitas palayanan bisa maningkat dan masyarakat banar-banar rasa manfaat rumah saki ini,” pungkas Wajo. (keket)
