AmbonVibes.com – Tamba deka parayaan Har Kajadiang 2025 deng Tambaru 2026 (Nataru), Komisi II DPRD Provinsi Maluku minta PLN kase parhatian khusus par sadia listrik di pulau-pulau tarpancil. Anggota Komisi II Anos Yeremias bilang bagitu waktu stori-stori deng wartawan di Ambon, Rabu (10/12/2025).
Anos tegaskan, mo tutu taong ini, orang-orang pung kabutuhan dasar macang listrik deng minya musti tasadia deng bae.
Secara khusus, Anos ajak lia kondisi
Kabupaten Maluku Barat Daya (MBD) yang masih susah listrik. Ada satu dua tampa yang sahari cuma anam jam listrik manyala.
“Dar sapuluh titik parbaikan yang PLN kase tau, dua ada di Tanimbar sadangkan dalapang ada di MBD. Daerah Molumaru, Wulan Labobar, Pulau Luang, Lakor, deng Damer cuma dapa listrik anam jam sahari. Lalu di Pulau Romang deng Wetar Timur, pasokan listrik saring seng stabil,” ungkapnya.
Anos juga bagi pangalaman bantu masyarakat pulau tarpancil, misalnya kirim masin diesel di kapal parintis maski secara atorang seng boleh. Manurut dia, hal ini dia biking cuma par warga rasa nyaman dan ada dapa listrik.
Anos tekankan, manjalang Har Kajadiang, PLN parlu kase prioritas par masyarakat, khususnya umat Sarani bisa maso Kajadiang deng bae.
“Katong minta mulai 20 Desember, daerah yang biasa dapa listrik 6 ato 12 jam sahari dapa kas nae jadi 24 jam. Kalo sama skali seng bisa, minimal nae jadi 12 jam,” jelas Anos.
Salaeng Kajadiang, Anos tekankan parlu kabijakan sarupa waktu Idul Fitri, agar umat Salam di tampa tarpancil juga dapa rasa layanan listrik yang bae.
Maski mangaku paham tantangan PLN takait anggaran dan kondisi geografis yang susah, Anos harap usulan ini bisa lakas PLN biking akang par mo pastikan orang bisa rayakan hari basar agama yang aman deng nyaman
“Khusus par MBD, katong harap PLN kase perhatian khusus par warga bisa rayakan dong pung hari basar agama deng nyaman dan tenang,” tandasnya. (Leo)
