AmbonVibes.com – Pengacara Nasional Djamaludin Koedoeboen kumbali soroti kinerja Kejaksaan Negeri Maluku Tenggara (Malra) soal pananganan parkara dugaan korupsi yang sampe oras tadi seng majo-majo, malah tatahang di tampa.
Djamaludin rasa parlu kas kaluar tagorang moral pas lia Kajari deng Bupati Malra paleng mesra dalang banya kagiatang, Bae seremonial maupun bukang seremonial.
Malalui sambungan telepon, Jumat (5/12/2025), Djamaludin bilang secara prinsip hubungan bae kapala daerah deng aparat panegak hukum bukang masalah. Mar kalo banya parkara hukum tadudu di tampa dalang waktu lama, hubungan mesra macang bagitu patut jadi masalah.
“Kalo lia dar sudut pandang kemitraan, ini sah-sah saja. Mar kalo parkara tadudu tampa, kemesraan itu bisa saja akang ada pung maksud laeng,” ungkapnya.
Djamaludin bilang, bukang seng mungkin masyarakat nilai kadekatang itu jadi bageang dar upaya kas mulus kapentingan tartentu, tarutama manyangkut perkara yang libatkan eksekutif.
Menurut dia, kamandekan yang tarjadi bukang parsoalan kacil. Justru karena itu, dia angka isu itu dalang Rapat Panitia Kerja (Panja) Reformasi Hukum Komisi III DPR RI deng Kejaksaan, Kepolisian, dan Pengadilan di Jakarta, Kamis (4/12/2025).
“Jang sampe masyarakat rasa ada kasus yang sangaja dong kas maso di peti es. Ini yang katong biking inga dalang rapat bersama Komisi III,” tegasnya.
Dia tambahkan, Komisi III su sapakat par pangge Kajari deng Kapolda Maluku par minta panjelasan takait parkambangan parkara-parkara yang mandek, tarmasuk kasus Landmark Langgur dan balanja masker Covid-19 tahun 2020–2021.
Djamaludin pastikan, dalang waktu deka-deka ini, Komisi III DPR RI mo pangge Kajaksaan Negeri dan Kapolisian Daerah Maluku par bahas dua kasus itu.
“Mungkin dalang waktu deka, Kajari dan Kapolda dapa pangge dar Komisi III DPR RI par bahas kasus Landmark deng Covid-19,” tutupnya.
Sabalong ini media kas kaluar barita dar Djamaludin yang bilang ada dugaan korupsi pambangunan Landmark Langgur deng korupsi kepeng masker Covid-19 sanilai Rp60 miliar, yang akang pung pananganan seng jalas di Kajati Maluku Deng Polda Maluku. (Vera)
